Daghang adik sa City Hall

Daghana gyud diay’ng adik sa mga kawani sa Cebu City Hall no? Tiaw mo nga dihang gipakalitan og drug test ang 246 ka kawani sa Department of Engineering and Public Works (DEPW), 15 gyud kanila ang namatud-an nga tiggamitan og gidiling drugas.

Sa tanang department sa Cebu City Hall, ang DEPW maoy adunay labing daghan og mga kawani nga napositibo sa gipahigayong drug test. Siyam na ka department sa City Hall nga ang mga kawani gi-drug test sa COSAP, apan halos walay adik kanila, duna la’y duha nga napositibo.

Miabot na og 32 ang tanang kawani sa City Hall nga napositibo sa drugs test, apil ang 15 ka sakop sa civilian security force sa City Hall nga gitawag og Barangay Intelligence Network (BIN). Kinahanglang imatuod gyud ni Mayor Tomas Osmeña nga matinud-anon siya sa kampanya batok sa drugas pinaagi sa pagtaktak sa serbisyo sa mga napositibo.

Ang lagda mao nga kon regular employees nga covered sa Civil Service Commission (CSC), pasakaan sila og kasong administratiba ug husayon sa mga sakop sa City Legal Office, apan kon mga kaswal ug Job Order workers, mahimo ra nga taktakon dayon sa trabaho.

Dili angay’ng magtipig ang City Hall og mga kawani nga adik, bisan og sila mga dumadapig pa sa mayor ug sa iyang mga alyado nga opisyal.

* * *

Dunay taga Barangay Kamagayan, dakbayan sa Sugbo, nga mitug-an kanako nga kadtong tanod nga nadakpan sa Regional Special Operations Group (RSOG) tungod sa kalambigitan niya sa operasyon sa illegal swertres, gipabalik ra man sa serbisyo human nga nakapiyansa.

Uy, dunay lumolupyo diha sa Kamagayan nga nakakuwestyon ni Kapitan Raquel Avila kon ingon lang ba niini ang iyang himoon. Para kanako, angay gyud nga dili na pabalikon sa iyang serbisyo ang maong tanod.

Mahimo tingali nga pabalikon ang maong tanod sa serbisyo kon masuta sa hukmanan nga dili tinuod ang pasangil sa kapolisan nga siya nalambigit sa didto sa hukmanan. Ngil-ad kaayo tan-awon nga ang usa ka “agents to persons in authority” diha sa barangay Kamagayan, gilambigit sa illegal nga drugas.

Kon dili man gani tinuod ang pagtuo sa uban nga ang illegal swertres operation diha sa Kamagayan gidumala sa mga opisyal, kinahanglang molihok ka Kapitan Avila.

Dili ko dayon motuo sa gisulti ni Konsehal Celestino “Tony” Avila dihang gi-interview sa Bombo Radyo sa miaging semana, nga ang kapitan kuno maoy nag-operate sa illegal swertres sa Kamagayan, apan kon mao ni nga pabalikon ra dayon ang tanod nga nadakpan, hinayhinay na ko nga motoo ni Konsehal Avila.