Kausaban sa batasan

Dako na kaayo og kausaban ang batasan sa mga batan-on karong panahona, kon itandi nimo kaniadto. Usahay gani, makapanglingu-lingo ko nga maghunahuna sa kalahian na sa batasan sa mga batan-on karon, ug sa hilom nangandoy ko nga unta mobalik ang maong panahon.

Ang mga Sugboanon, mahigugmaon gyud sa iyang pamilya. Panahon sa akong kabatan-on, inigka alas sayes sa gabii, ang kabataan mag-alirong na atubangan sa altar uban sa ilang mga ginikanan aron mangadye sa Angelus. Magbanus-banos kami kaniadto sa pagpangulo sa pangadye.

Kaniadto gani, may mga pamilya man nga ang mga sakop niini motuyo ra gyud pagbangon sa kaadlawon aron magdungan na usab sa pag-ampo.

Human sa pag-ampo sa Angelus, nga gitawag kaniadto og oracion, ang mga sakop sa pamilya magdungan pag-adto sa talad-kan-anan alang sa panihapon. Didto, ang masi’g ka sakop sa pamilya magsultihanay sa ilang nahimo nianang adlawa.

Kadto si Papa Inting daghan kaayo og mga istorya, ilabi na ang mga makapadasig ug makalingaw nga sugilanon sa iyang kabatan-on. Giisip ko kadtong maong higayon nga halandumon gyud kaayo ug nakapasamot sa among panagsuod sa pamilya.    

Kami si Eddie ug ang akong igsuong babaye nga si Inday Sering nagminahalay gyud pag-ayo ug nagrespetohay sa usa’g-usa. Panahon nga aduna mi panginahanglan, modangop mi sa among ginikanan.

Kanindot gyud sa batasan sa kabatan-onan kaniadto nga puno sa pagtahod ug respeto, ilabi na ngadto sa mga labaw kanila og pangedaron. Kaniadto, mangayo gyud kami og katahoran, sama sa pag-ingon “maayong udto, maayong gabii” kon makasugat og mga tawo, bisan og dili kaila.

Mo-amen kami sa kamot sa mga tigulang dungan sa pagsangpit kanila og “Lola” ug “Lolo” bisan og dili sila namo mga apohan. Nabatasan usab namo kaniadto nga kon adunay bisita sa among panimalay, ihikyad gayud namo ang pula nga carpet ug gamiton alang kanila ang tinipigan nga mga baso ug plato nga buhat gikan sa China.

Kon magdugay ang bisita ug adto matulog sa among panimalay, andaman gayud sila sa among ginikanan sa labing nindot nga habol, unlan ug tualya.

* * *

Karong sunod Domingo, hisgotan nato ang kalahian sa batasan sa kadaghanan sa mga batan-on karong panahona.