Major Jonkie Ouano

Una sa tanan, akong mainiton nga pagbati sa bag-ong na-commission sa Philippine Army Reserve nga si Provincial Board Member Thadeo Jovito “Jonkie” Ouano sa ranggo nga Major. Kagahapon, miduaw si Major Ouano kang Col. Nestor Abando sa buhatan niini sa 7th Regional Community Defense Group (7RCDG) aron dawaton ang iyang order nga nag-commission kaniya sa reserve force.

Si Major Jonkie Ouano misunod sa tunob sa iyang amahan nga kanhi mayor sa Mandaue City ug board member sa ika-unom nga distrito nga si Major Thadeo Ouano, kinsa nahimong S4 (Logistics Section) Staff Officer sa 1901st Ready Reserve Infantry Brigade sa wala pa kini motaliwan niadtong Pebrero 26, 2016.

Ang mga barkada ni Major Ouano nga silang Cesar Conde ug Noel Acedillo na-enlist usab isip mga Army Reservist sa ranggo nga Corporal.

Human unya sa donning of rank ni Major Ouano, idestino siya sa 1901st Ready Reserve Infantry Brigade nga gipanguluhan ni Brigadier General Erik Miguel Espina.

Akong mga pasalamat sa pamilyang Ouano, ilabi na kang Ninang Linda, kang Lolypop Ouano-Dizon ug sa tibuok pamilyang Ouano sa Opao, Mandaue City, nunot sa ilang mainitong pagsuporta sa pag-commission kang Major Ouano sa Army Reserve.

* * *

Gidawat na kagahapon ni Presidente Rody Duterte ang resignation letter ni Justice Secretary Vitaliano Aguirre III. Ang mga kontrobersiya nga nagpalibot sa Department of Justice maoy gipasanginlang hinungdan nganong mibiya si Aguirre sa maong ahensiya.

Nagsugod ang kontrobersiya sa dihang migawas ang balita nga adunay DOJ resolution nga nagrekomendar pagbasura sa kaso nilang Peter Lim, Kerwin Espinosa ug Peter Co. Ang rekomendasyon sa mga prosecutors napirmahan niadtong Disyembre, apan nabaniog niadto lang miaging bulan. Hinuon, gi-overrule ni Aguirre ang resolusyon sa mga prosecutors, ug gimando ang pag-reopen sa kaso batok nilang Lim, Espinosa, ug Co.

Laing nakapakusog sa panawagan pagpa-resign kang Aguirre mao ang pagbutang sa Witness Protection Program kang Janet Lim Napoles, kadtong giingong utok sa pork barrel scam sa Kongreso.

Dinhi sa Sugbo, nahimong kontrobersiyal si Aguirre human siya mipasangil nga si Mayor Tomas Osmeña nakadawat og P7 milyones gikan kang Jeffrey “Jaguar” Diaz, nga sumala pa sa kalihim, gisugid sa ig-agaw sa maong druglord, nga si Reynaldo “Jumbo” Diaz sa iyang affidavit.

Nagsugod ang away nilang Tomas ug Aguirre sa dihang nasuko si Tomas nga matud niya giimpluwensiyahan ang tax evasion case batok sa BDO. Sa nahitabo karon ni Aguirre, angay na ba nga magselebrar si Tomas?

Karon nga wala na sa puwesto si Aguirre, ipadayon pa ba ni Tomas ang disbarment case batok sa mi-resign nga kalihim? Kon idayon, motalab kaha?