EDITORYAL - Nagtudlo og pangurakot

Kadtong mga batan-on nga gustong manerbisyo sa kagamhanan angay gyud unta nga tudloan ug pasabton nga sila maoy gilauman nga makapausab sa imahe sa mga kawani sa gobiyerno nga gihulagway nga daghan kanila ang mga corrupt. Sama gud unta sa mga batan-on nga gidasig pagkat-on kon unsaon sa pagdumala sa kagamhanan pinaagi sa pagpapili isip mga opisyal sa Sanguniang Kabataan (SK) aron nga kon mahingkod na sila, ang maong mga batan-on mao na usab ang modumala sa nasud.

Apan unsaon man pagkab-ot nato og kausaban sa atong nasud kon sa pagpangaplay pa lang niining maong mga batan-on, aron mahimong sakop sa kapolisan, Bureau of Jail Management and Penology; Bureau of Fire Protection, o kaha Philippine Drug Enforcement Agency, kilkilan na sila sa mga kurakot nga mga opisyal? Daghang bag-ang ang nagpangagot sa kasuko diha nga nasayran nila nga dunay mga batan-on nga nangaplay unta aron mahimong sakop sa BJMP, apan gikilkilan kini sa usa ka opisyal. Maayo na lang gani kay dunay mga applicants nga mireklamo ug gihimo ang entrapment operations sa pagsikop sa babayeng opisyal.

Ang pagkasikop sa mao nga BJMP official dinhi sa Sugbo, nga miretiro na gani sa katungdanan kaniadtong Marso 30, magsilbi unta nga leksyon sa mga hingtungdang opisyal nga dili gayud maayo nga tudloan na nila og binuang ang mga applicants. Ang gipangayo nga dakong kantidad sa maong opisyal maoy bugti nga madawat ang mga applicants isip sakop sa BJMP. Sa iyang gihimo, sigurado nga ang mga dabong pa nga kaisipan sa mga applicants magtuo nga dili gyud diay masumpo ang corruption sa kagamhanan.

Dili imposible nga kon anaa na unya sila sa serbisyo, ang gihimo kanila sa maong abusadong BJMP official, himoon usab nila, ingon man ang uban pa nga ilegal nga kalihukan sa ilang pagpanerbisyo.