EDITORYAL - Pagpamakuna pahimusli

Dili malalis nga ang usa ka iro, higala gyud sa iyang agawon nga maoy nagpakaon kaniya kanunay. Molaban pa gani ang iro kon makita niya nga nag-atubang sa kakuyaw ang iyang giilang agawon. Daghan kaayo ang ganahang mobuhi og iro, kay halos matag balay, duna gyu’y iro.

Samtang daghan ang ganahan kaayo nga mobuhi og mga iro, pipila lang kanila ang tinuoray’ng nag-atiman ug nag-isip sa ilang binuhi nga matuod gayud nila nga higala. Ang uban pakan-on ra nila ang ilang iro og momho ug salin sa ilang makaon. Kon ganahan sila pagkaon, walay mahatag sa iro.

Dili gani makapaligo sa ilang mga iro, ug sa pagpa-injection niini aron nga kon aksidente nga makapaak, kadtong mapaakan dili mameligro nga matakboyan og rabies. Ang rabies makamatay, apan ang kagamhanan wala magpasagad sa ilang kaakohan. Gani, dinhi sa dakbayan sa Sugbo gisugdan kagahapon ang city-wide anti-rabies vaccination.

Wala’y angay’ng kabalak-an ang mga tag-iya sa iro kay libre ang pag-injection sa ilang mga binuhi. Gitumong kini aron nga wala gyu’y matakboyan og rabies dinhi sa dakbayan sa Sugbo karong tuiga. Angay nga kadtong adunay mga binuhi nga iro, magpakisayod sila sa ilang mga opisyal sa barangay aron masayod kanus-a ang pagpamakuna sa ilang dapit.

Ang team sa mga tigbakuna gikan sa Department of Veterinary Medicines nga gipangulohan ni Dr. Alice Utlang moadto gayud sa lainlaing mga sityo sa kabarangayan aron sa pagpamakuna. Ang himoon ra gyud sa mga namuhi og iro mao ang pag-andam sa ilang mga iro. Husto lang nga inighuman niining city-wide anti-rabies vaccination, hugtan na ang pagpamulta niadtong mga tag-iya og iro nga wala motuman sa balaod nga iparehistro ug pabakunahan ang ilang mga binuhi. Dos mil pesos ang multa sa masakpang wala magparehistro ug magpabakuna sa ilang mga iro.