Itug-an kun kinsa ang mastermind

Gilubong na kagahapon ang gipatay nga kapitan sa Barangay Ermita ug may nagtuo nga si Imok Rupinta gitiklo tungod sa politika. Ako hinoon, wala gyud motuo niini kay ang akong gituohan nga siya gipatay tungod sa ilegal nga drugas ug sugalan.

Pero, atong awhagon ang kapolisan ingon man ang National Bureau of Investigation, kay miapil man usab ang NBI sa pag-imbestigar sa pagpatay ni Rupinta, nga mopagawas na sila sa ilang konklusyon kon kinsa gyud ang nagpapatay sa kapitan.

Kadtong nabutyag sa media nga si Jimmy Largo, ang usa sa mga suspek pagpatay ni Rupinta nga nadakpan sa kapolisan, nga mitug-an kuno nga gi-hire unta siya sa kanhi konsehal sa Ermita aron patyon ang kapitan, angay usab kadto nga pamatud-an.

Dili man malilong kon kinsa ang maong kanhi konsehal nga gipasabot ni Largo, apan kinahanglang iya kining ibulgar gyud sa publiko. Tungod niining pamahayag ni Largo, gigamit kini sa mga kontra sa mayor nga sila magduda nga may taas pa nga opisyal nga nalambigit.

Unya kay ang tawo nga giingong konsehal kaniadto sa Ermita suod man kaayo sa mayor, misamot nga nagduda ang mga kritiko ni Mayor Tomas Osmeña. Apan, para nako, lisud katuohan kay kon batasan pa ni Tommy nga mopapatay sa iyang mga kontra, nangamatay na unta sila si kanhi mayor Alvin Garcia ug Mike Rama?

Apan sagdi lang, awhagon gihapon nato ang kapolisan nga dalion nila ang imbestigasyon ug ibutyag kinsa ang giingong tawo nga nagsugo sa pagpapatay ni Imok.

Ang ako lang niining mao nga isyu, kon sirado na gani ang hunahuna niadtong mga kritiko sa mayor, sa ato pa wala na gayud sila magtuo nga si Rupinta gipatay sa gambling lord ug drug lord?

Balikon nako nga mga duha ka buwan sa wala pa patya si Rupinta, siya ang nagtug-an sa daghan kaayong video karera ug moli-moli nga nag-operate diha sa iyang barangay.

Tungod niadto, gipalihok dayon ni Cebu City Police Director Joel Doria ang iyang mga polis ug nasakmit ang kapin sa 80 ka video karera machines. Si Imok, nihatag pa gyud og inpormasyon ngadto sa PDEA bahin sa mga tigbaligya og drugas sa Ermita, hinungdan nga nadakpan ang iladong bata-bata sa druglord.

Kanunay nako nga gi-interview si Rupinta sa wala pa siya patya mao nga suheto ko sa iyang kampanya batok sa ilegal nga kalihukan ug maoy gituohan nako nga rason nga siya gipatay.