Kaguliyang sulod sa tambalanan

Nag-viral sa social media ang engkwentro tali sa pasyente ug nurse sa ospital sa lungsod sa Balamban.

Sa video, makita ang pasyente nga misulong sa nurse station ug nangasaba sa usa ka nurse gumikan sa reklamo o wala matagbaw sa serbisyo.

Nangatarungan ang nurse, apan nisamot hinoon sa pagkasuko ang babayeng pasyente ug mitulisok na hinoon kaniya. Nainit ang nurse ug mibundak sa iyang chart record sa lamesa nga mipasamot sa tensyon.

Nasuko og samot ang pasyente kay wala kuno motug-an dihang gipangayoan niya og ngalan ang nurse nga misangpot sa pagbitad sa bana sa gikwentas nga ID sa nurse.

Nagpa-blotter na ang nurse sa police station bahin sa hitabo ug may imbestigasyon na nga gihimo karon ang Provincial Health Office. Nasuta nga usa ka magtutudlo ang pasyente hinungdan nga misusi na usab karon ang Department of Education. Kon ang video lang maoy atong basehan daghan g’yud ang makasaway sa gihimo sa pasyente nga misulong g’yud sa nurse station.

Ang pagkamasakiton sa usa ka pasyente wala maghatag kaniya og lisensya nga mahimo na nga mangasaba ug motulisok ni bisan kinsa, ilabi na sa pagdapat sa isigka tawo.

Samtang dili lang pud nato hukman dayon ang pasyente base lang sa video kay basin og dunay lawom nga hinungdan sa pag-ulbo sa kasuko sa pasyente.

Basin og napuno ug niawas na ang gantangan niya kay gibaliwala lang ang ilang gipadangat nga sentimento.

Puwera sa mga tinuoray nga nagserbisyo, aduna gyuy mga medical practitioner sa mga pampublikong tambalanan nga balasubas nga magpakabuta-bungol sa yangungo sa mga pasyente.

Ang mga tagtungod nataranta na kay basin unsay mahitabo sa pasyente apan ang uban nga medical staff galutok lang ang mata, mangasaba pa usahay, ilabi na kon tan-aw nila “yamukmok” ra ang pasyente.

Angayan tan-awon sa mga tagdumala og mga public hospitals ang pamatasan sa ilang mga nurse, doctor ug ubang medical staff aron wala’y pasyente nga moulbo.

Sa mga pasyente, dili sab mo mga Don ug Doña nga motratar sa mga nurse nga inyong suloguon.