Ahat nga sulbad sa kaso
Dunay problema ang kapolisan. Mahimo nga ahat pa ang ilang pagdeklarar nga nasulbad na ang kaso sa pagpatay ni PO1 Mae Sasing nga gibanhigan ug gipusil patay didto sa Basak, Mandaue City samtang nagsakay sa iyang motorsiklo gikan sa iyang trabaho sa Lapu-Lapu City Police Office paingon sa iyang pinuy-anan sa Jugan, Consolacion.
Ang ilang gipasanginlan nga mamumuno, si Felix Taytayan, may lig-on nga panalipod sa iyang kaugalingon: Naghakot siya og mga kargamento sa barko dihang nahitabo ang pagpamanhig. Niinsistir ang iyang kaubanan nga tripulante nga kauban nila si Taytayan sa tibuok gabii niadtong Oktubre 31.
* * *
Ang kapitan sa MV Gemini 10 nga si Ariel Mancio nitug-an sa DYAB Radyo Patrol nga kuyog si Taytayan sa ilang biyahe gikan ug paingon sa Madridejos sa Bantayan Island ug Dakbayan sa Sugbo sulod sa tulo ka adlaw gikan sa Oktubre 30 hangtud sa Nobiyembre 1.
Matud ni Mancio nisakay sa iyang barko isip kargador sa ilang biyahe gikan sa Madridejos niadtong Lunes sa gabii, Oktubre 30, hangtud sa ilang pagdunggo sa pantalan sa Dakbayan sa Sugbo sa alas-4 sa kadlawon niadtong Martes, Oktubre 31.
Nagpabilin si Taytayan pagpangalsa sa mga kargamento sa barko sa tibuok adlaw hangtud sa ilang paglawig balik sa Madridejos pagka gabii sa Oktubre 31 ug sa ilang pagdunggo sa Madridejos sa kadlawon sa Nobiyembre 1.
* * *
Laing tripulante sa MV Gemini 10 nga si Angelo Vilches nipahibawo sa DYAB Radyo Patrol nga nagpaingon na sila sa Madridejos dihang nabasahan ni Taytayan sa Facebook sa iyang telepono ang nahitabo ni Sasing.
Masulub-on nga nipahibawo niya si Taytayan nga classmate silang Sasing. Apan wa maghisgot si Taytayan nga may relasyon ba sila. Nitug-an si Vilches nga may hinigugma si Taytayan nga taga Consolacion sab nga niduaw gani nila sa barko nga nagdala og pagkaon, apan dili si Sasing.
* * *
Gidakop sa kapolisan si Taytayan sa ilang balay sa Barangay Kaongkod, Madridejos niadtong Nobiyembre 3, Biyernes. Pagka Sabado, Nobiyembre 4, may mga polis nga nakighinabi ni Mancio.
Apan bisan sa pag-insistir ni Mancio nga wa mabuwag si Taytayan gikan nila sa gabii sa krimen, gipasaka sa kapolisan ang kasong pagpatay niadtong Lunes, Nobiyembre 6.
Atong susihon kon makabarug ba ang kaso sa piskaliya.
- Latest
