Brgy Tejero, Cebu City

“Concern lang ko sa mga trabahante sa paghimo og tulay diri sa among barangay kay ang gisweldo kanila sa mga contractor kay below minimum ra g’yud intawon, ug wala pa g’yud sila’y mga safety harness.”

Brgy Tomonoy, Moalboal, Cebu

“Ang karsada diri guba na kaayo, wala g’yud atimana. Among nahibaw-an nga may budget na man unta ni.”

Brgy Sacsac, Dalaguete, Cebu

“Daghan man gihapong drug pushers nga wa madakpi diri kay naa kuno’y nagpaluyo. Samot na g’yud ning problemaha kay ang mga polis dili na man kaha manakop.”

Brgy Poblacion-Oriental, Consolacion, Cebu

“Diri sulod sa merkado publiko sa lungsod naa man gihapo’y daghang namaligya’g Butane, ila lang gitagotago, wala i-display. Dili ba gidili naman kini kay delikado kaayo sa sunog, labi na kon tayaon na ang canister?”

Brgy Tabunok, Talisay City

“Ngano nga wala man g’yud ni dakpa ang mga namaligya’g Butane diri sulod sa merkado sa Nacario nga dayag man kaayo ang ilang pag-display sa mga canister nga tayaon ra ba g’yud ang uban. Nagduda mi nga naa kini sila’y kapit diha sa mga opisyal sa barangay ug sa siyudad kay wala man mahadlok.”

Brgy Labogon, Mandaue City

“Gamay ra gani kaayo ang among karsada diri, pero parkingan pa man sa mga sakyanan sa kilid, misamot kalisod ang pag-agi, labi na kon magsugat ang mga sakyanan.”

Brgy Kalunasan, Cebu City

“ Kining sa ubos nga bahin sa among barangay naa’y among silingan nga nagpasugal og mahjong ug tong-its, saba kaayo, labi na sa gabii nga maglisod mi pagkatulog. Wala man g’yud kini mabadlong nga unta may silingan man kami nga polis.”

Brgy Punta Engaño, Lapu-Lapu City

“Mohangyo lang unta kaming mga gagmay nga mananagat diri nga unta dakpon kining kanunay’ng mohimo’g dynamite fishing sa kadagatan sa Sitio Malingin. Buntag ug hapon na sila nga molabay og dinamita, bisan og daghang tawo nga maligo.”

Brgy Bajac, Liloan, Cebu

“Concern lang g’yud ko sa mga motor nga mag-agian diri nga saba kaayo kay ang ilang mga tambutso gipang-ilisan man, makatugaw g’yud sila sa mga nakatulog na. Maayo unta og naa’y makabadlong nila kay bisan og lawom na nga gabii, magsige man og bahas-bahas sa karsada.”

Brgy Talamban, Cebu City

“May silingan mi diri sa Nasipit nga kusog kaayo magpatukar sa iyang sound system, bisan og gabii na kaayo, dili maikog sa mga silingan nga nangatulog na. Nagsalig tingali ni siya kay naa’y pistola mao nga maghari-hari diri sa among lugar.”

Alang sa inyong mga reklamo, text lang sa 09083006702 / 09953598138