Brgy San Nicolas, Cebu City

“Kadugay ba nahuman sa pagtrabaho sa among drainage system diri, luoy na kaayo ang kahimtang sa mga nagpuyo. Mura na man og dagat diri kay kon mag-uwan ug may moagi nga sakyanan magbawod pud.”

Brgy Kansi, Tuburan, Cebu

“Manghinaot kami nga mahuman na ang problema tali nila ni Lagon ug Diamante kay aron matrabaho na sab kining among karsada gikan sa Caridad padulong sa Bakyawan. Dugay na kaayo kini namo nga problema, pero wala pa g’yud maatiman.”

Brgy Ibo, Lapu-Lapu City

“Mohangyo unta kami nga madakop kining mga liba-liba diri sa kadagatan duol sa among barangay kay wala na g’yud intawo’y makuhang isda ang mga gagmay nga mananagat. Ang mga sakop sa bantay dagat wala na man magpakabana sa problema.”

Brgy Bulacao, Talisay City

“Diri sa Lower sa Saint Francis naay naninda’g butane nga grabe na katayaon sa mga canister. Kuyawan mi nga naay mga buslot nga mao na hinoon ang hinungdan sa sunog. Maayo unta og susihon dayon ni.”

Brgy Tejero, Cebu City

“Kining luyo sa karaang CPDRC naay tawo diha nga maoy nagpasiugda niining moli-moli nga gipahimutang sa laing mga balay. Labi na kon mabuntag kay maghuot ra ba g’yud ang balay sa mga moduwa sa moli-moli.”

Brgy Guinsay, Danao City

“Mas maayo tingali nga masusi sa mga polis kining among lugar kay naa man gihapo’y nabantayan namo nga namaligya og shabu, pero wala lang g’yud dakpa sa mga polis. Mga bata maoy gigamit sa pagpamaligya.”

Brgy Ermita, Cebu City

“Naay lugar diri sa among barangay, labi na daplin sa sapa, kay naa diha ang pinalitay sa shabu kay ang maghatod niini gikan man sa Lawis-Pasil unya anha ra itunol sa gamay nga taytayan diha sa sapa. Kinahanglan g’yud nga kanunayon sa mga polis ang ilang monitoring.”

Brgy Casili, Consolacion, Cebu

“Badlungon unta ang ubang mga habal-habal driver nga magbiyahean diri kay ang uban mura’g sabog o hubog nga mag-drive. Ang among makuyawan kon simbako madisgrasya, unya mga bata ang pasahero labi na sa mga estudyante.”

Brgy Poblacion, Danao City

“Subra naman kaayo ang gibuhat sa usa ka polis diri sa among siyudad kay gironda nila ang balay sa akong ig-agaw, pero kay wala man diha ang ilang subject, ila man hinoon gipamusil ang mga hiniktan nga manok nga wala man untay labot sa ilang ronda.”

Brgy Alang-Alang, Mandaue City

“Ireklamo namo kining usa ka kompaniya diha sa may Sitio ABBRA kay hapit kada buntag magpabuga kini og aso nga pwerteng itoma. Dili ba gidili man na sa balaod kay pollution man na ug makadaot sa panglawas?

 Alang sa mga reklamo text lang sa 09083006702