Brgy Talisay, Santander, Cebu
“Naunsa man ang nagdumala niining tindahan atbang sa grahean sa Ceres bus nga dili man modawat og tag 25 sentimos nga coins, inig palit namo sa ilang tindahan. Mura naman hinoon og dili na madawat ang maong coins diri sa among lugar.”
Brgy Tabunok, Talisay City
“Ngano nga wala man ni dakpa sa mga polis kining duwa o sugal nga lipat-lipat nga klaro naman kaayo kining pagpangilad. Naa na duol sa Happy Mart makit-an kada adlaw, daghan na kaayong mga nailad nga mga tawo diri.”
Brgy Libertad, Bogo City
“Sige na lang og kaguba ang karsada diri kay naa’y magsige’g agi nga mga dumptrucks gikan sa Maranog. Hinaot nga matagad kini nga problema kay dugay na nga nag-antos ang mga tawo diri sa gubaon nga karsada.”
Brgy Basak, Cebu City
“Kining Lower Kauswagan hangtod karon wala pa man g’yud mapaayo ang drainange system kay kon mag-uwan dali kaayong magbaha. Kanus-a man intawon kini matagad?”
Brgy Agus, Lapu-Lapu City
“Diri sa Sitio Ibabao, naa may magsige’g agi diri nga police patrol car, halos kada gabii, pero wala man manakop ug namaligya’g shabu. Nagtuo kaming manakop wa man hinooy gihimo, magduda na lang ta.”
Brgy Tubod, Minglanilla, Cebu
“Kusog kaayo ang negosyo sa car wash diri tungod sa kaabunda sa tubig. Pero miabuso man ang ubang car wash kay hapit na man lang ukopahon hasta ang karsada kon manglimpyo sa sakyanan.”
Brgy Busay, Cebu City
“Ang aseras sa karsada atbang sa barangay hall padulong sa karaang Casino kay gihimo na man hinoong displihanan og mga baligya. Ngano nga wala man g’yud ni badlunga sa mga opisyal diha sa barangay nga klaro man kaayong ilegal ang ilang gipanghimo.”
Brgy Yati, Liloan, Cebu
“Ireklamo lang namo kining karsada gikan diri sa Bagong Dalan padulong sa Kapulay ug Simborio kay pwerte na man lang g’yud nga gubaa, wala man g’yud kini ipaayo. Kanus-a pa man intawon kini atimanon, kon may madisgrasya na?”
Brgy Busay, Cebu City
“Abusado kaayo kanang namaligya diha sa may gasoline station ug barangay hall kay naa naman sa karsada. Nasaghiran ang iyang tinda sa sakyanan mao pa ang masuko, magpabayad pa nga dili man intawon tindahan ang karsada, unya klaro kaayo nga wa’y permit.”
Brgy Dapdap, San Remigio, Cebu
“Pasalamat kaayo kami sa Banat News kay dali kaayong nakatagad sa among reklamo diri sa among barangay. Pero sa gihapon ang among mga opisyal nagpakabuta-bungol sa problema namo sa karsada diri, sa ubang barangay sementado na.”
* * *
Alang sa inyong mga reklamo text lang s 09083006702
- Latest
