Dear Atty. Divine,
May problema ko labot sa support sa akong anak. Minyo ko for 7 years ug aduna mi usa ka anak sa akong bana. Niadtong miaging tuig, akong nahibaw-an nga may laing babaye ang akong bana. I tried my best to save our marriage, pero dili na g’yud nako makaya ang iyang gibuhat kay adto na man siya mouli sa iyang babaye.
Ang ako lang concern karon mao ang suporta sa akong anak. Unsay akong buhaton aron akong maseguro nga iyang suportahan ang among anak? Mahimo ba nako siya nga ikiha, kun dili siya mohatag og financial assistance sa among anak? Daghang salamat. — Laura
Dear Laura,
Ang una nimong buhaton mao ang pagpadala og demand letter ngadto sa imong bana alang sa imong pangayoon nga suporta sa imong anak. Ang amount niini, magdepende sa panginahanglan sa bata matag buwan ug magdepende sab kun pila ang maabot paghatag sa amahan.
Kon dili niya tagdon ang imong demand letter, then mahimo ka nga mopasaka og kaso ngadto sa korte batok sa imong bana. Mahimo siya nga imong pasakaan og kasong kalapasan sa Anti-Violence Against Women and their Children kay ang pagdumili niya sa paghatag og financial support usa ka kalapasan sa maong balaod.
Mahimo sab nimo siya nga ikiha og kasong concubinage tungod sa iyang pagpakigtipon og laing babaye. Pulos kana criminal case busa mahimo siya nga mabilanggo kon mapamatud-an. Apan kon ang imong gusto mao lang g’yud ang suporta sa bata, then mahimo sab nga Civil case lang ang imong i-file for Child support. Thanks and God Bless. — Atty. Divine