Ang sagbot

Dunay sagbot nga ginganlan og darnel nga mao ang matang sa sagbot nga nitubo kuyog sa mga trigo. Ang dagway niini sama sa trigo apan toxic kini nga matang sa sagbot. Ang trigo hinuon sa laing bahin ang makahimo man sa pagsukol niini nga sa ato pa, mabuhi ra siya bisan kon naa ang darnel nga mitubo uban niya. Mao nga inig-abot sa ting-ani anha pa galabon ang trigo kuyog sa darnel ug ang darnel ang himuong sugnod samtang ang trigo ibutang didto sa kamalig. Di maayo nga ibton ang darnel samtang gamay pa kay basin unya og maangin ang trigo ug mapornada ang ani. Ang salida nga seklusiyon nga namugna sa hunahuna ug arte ni Erik Matti maoy konkreto ug sikolohikal nga sukaranan nga bisan gani ang naa sa simbahan ang nakigharong man sa ilang inner demons.

Ang inner demons mao ang darnel sa kinabuhing tawhanon ug espirituhanon. Mga kahuyangan nga tungod kay bunga man sa tawhanong limitasyon ang padayong moabat kanato. Ang uban nato makigharong nila samtang ang uban igo lang mopahiuyon sa bul-og sa agni sa mga inner demons aron mamahimong komportable ang tanan bisan pa man kon kini di na husto.  Ang mahinungdanon ang tanan dali. Ang kahamtong sa panglantaw ug ang lamdag sa hunahuna ug pagbati maoy magdala nato sa paggalab sa mga inner demons aron sila isugnod diha sa kaamgo bisan pa man kon naa sila dunay kinabuhi sa grasya. Ug mao kana ang nakapahimo sa Grace nga Amazing.