Simple

Sa dihang nakabase pa ko sa Our Lady of the Sacred Heart Parish may schedule ko didto sa OPPRA Chapel. Human sa Misa giduol ko sa usa ka manimbahay kon nganong mubo ra kuno ang wali. Ako siyang gitubag:

“Nganong kinahanglan pa mang tas-on kon kamo gani mismo mangatulog ra!” The simple the better matud ko. Ang mensahe sa Dios halawom ug puno sa kahulogan. Ug kon buot hunahunaon dili nato kini matugkad kon tawhanong sumbanan lang ang himoong sukaranan. Apan si Jesus ang nipasayon niini ginamit ang tawhanong pinulongan ug kasinatian, iyang gihatud ang Pulong sa Dios ginamit ang yanong mga pamaagi aron masabtan.

Sama tingali kini sa matag dusong pastoral nga himoong simple ang tanan aron masabtan ug kay masabtan manghinaut kita nga mamahimo kining sukaranan sa kinabuhing nausab.

Ang Bibliya di lang alang sa kahibalo, ang Bibliya alang sa kausaban sa tawo.