Rebelyon ang gihimo sa mga sakop sa Maute

Naa sa pulong “rebellion” ang atake sa mga kritiko ni Presidente Rody Duterte. Ang mga kritiko, usa na niini si Senador Risa Hontiveros, miingon nga dili kinahanglan ang martial law aron pagpuhag sa mga teroristang Maute. Mahimo lang kuno kini pinaagi sa ordinaryong military operations.

Ang nakaalegre lang kay ang ebidensiya nga gipresentar sa mga kritiko uban sa ilang petisyon pagkuwestiyon sa martial law ni Duterte nga gisang-at nila didto sa Korte Suprema, gibase ra sa mga report sa media. Pastilan!

Si Solicitor General Jose Calida, sa interbyu sa telebisyon sa miaging gabii, nagkanayon nga andam ang gobiyerno pagpresentar og mga ebidensiya nga rebelyon ang gihimo sa mga teroristang Maute. Sumala pa ni Calida nga daghang intelligence report nga nadawat ni Presidente Duterte kalabot sa plano sa Maute pag-ilog sa Marawi City gikan sa Republika sa Pilipinas.

Masuportahan kini sa mga video clips nga gipagawas sa media. Usa na niini ang video diin sila si Isnilon Hapilon, lider sa Abu Sayyaf, uban sa magsuong Maute, nagplano unsaon pag-take over ang Marawi City. Pinaagi niining gi-declassify nga video nga nakuha sa mga sundalo sa pag-ilog nila sa usa ka kuwarter sa mga Maute fighters, makapasar isip rebelyon ang pagpangatake sa Maute. Apan para nako dili na angay’ng lalison pa sa mga kritiko kon rebelyon ba o dili ang gihimo sa mga Maute. Wala may gitago ang gobiyerno, bisan sa martial law declaration ni Duterte. Libre ang mga sakop sa national media nga nag-cover sa Marawi. Kadaghanan, kon dili man gani tanan, diha sa social media, uyon nga ipa-ubos ni Duterte sa martial law ang tibuok Mindanao.

Kay kon wala pa ipaubos sa martial law ang tibuok Mindanao, madakpan kaha si Cayamora Maute didto sa Davao City? Madakpan kaha sa Cotabato City si Farhana Romato Maute? Ug kon nangadakpan sila sa maong mga lugar nga wala’y martial law ug wala suspensoha ang pribilihiyo sa Writ of Habeas Corpus, dili kaha dali ra’ng pagawson sa ilang mga abogado ang mga ginikanan sa magsuong Maute nga nangulo sa pangatake sa Marawi?

Ang tuyo sa martial law mao nga kadtong supporters sa kasamok ug rebelyon dali nga madakpan. Ang nakadaot lang sa oposisyon, bisan unsay buhaton sa administrasyon, sayop para nila. Wala na lang gyuy husto. Kaniadto ra ba nga sila pa nga mga “dilawan” ang anaa sa puwesto, wala gyuy nanghilabot kanila, bisan giunsa og wariwari ang atong panudlanan pinaagi sa pork barrel.

Ang nakanindot ni Duterte isip commander-in-chief, sinsero siya sa iyang liderato. Ang nakadaot lang kay nalubat-lubatan ang mga oposisyon kay basin og panghantingon sila pinaagi sa martial law. Hadlok sa ilang mga anino!