Fake news!

Sa kadaghan sa mga mogawas nga inpormasyon sa newsfeed sa atong social media account, dili kita makaseguro kon asa ang tinuod, ug asa ang bakak, o fake news.

Kasagaran ra ba sa mga bakak nga balita maghatag og kabalaka ug kahadlok sa mga tawo kay misakay usab kini sa mga dagkong isyu sa seguridad sa nasud, sama sa terorismo.

Apan dili lang mga ordinaryong tawo ang responsable sa pagpakatap sa ubang fake news, sanglit ang mga dagkong opisyal sa gobiyerno man maoy mismo responsable niini.

Karong bag-o lang, si Justice Secretary Vitaliano Aguirre II mipasangil nila ni Senador Bam Aquino ug Antonio Trillanes IV nga miadto sa Marawi City sa wala pa mahitabo ang terorismo nga gihimo sa Maute group.

Ang tonada sa estorya ni Aguirre mao nga daw iyang gilambigit ang naasoy’ng mga opisyal sa panghitabo.

Apan gipanghimakak sa mga senador ang pasangil ni Aguirre dungan sa pagmatuod nga may lain silang gitambongan sa maong petsa nga giingon ni Aguirre.

Tungod kay nasupalpal man si Aguirre, mipasangil dayon kini sa media nga na-misquote lang siya. Pastilan, mura man og giangu-ango na tingali ning tawhana. Wala uroy mauwaw sa paghimo og estorya nga dili tinuod, sama sa iyang buhok nga fake.

Si PCOO Assistant Secretary Mocha Uson migamit usab og fake nga letrato sa iyang post mahitungod sa sitwasyon sa mga sundalo.

Ang National Bureau of Investigation (NBI) nanganti nga pasakaan og kaso ang mga tawo nga mopakatap og fake news. Hala unaha ang inyong boss kay under man kamo sa Department of Justice.

Kanatong mga tawo, dili ta motuo dayon sa mga inpormasyon nga atong mabasahan ug madunggan, kay nahulog kini nga believe it or not.