Polis o tulisan?

Alas 9:00 sa gabii kaniadtong Mayo 19, naukay ang katawhan sa sityo YBO South Poblacion, San Fernando, kay adunay nagmaskara ug mga armadong tawo nga kalit niabot sa panimalay sa pamilyang Delfin ug mimandar sa tagbalay nga pasudlon sila.

Pwerteng hadloka sa tagbalay kay naka-bonnet man ang mga tawo ug nagtuo sila nga mga tulisan ang grupo, labi na kay armado sila. Maayo gani kay wala gyud maratol ang tagbalay ug nangutana kun unsa ang katuyoan sa mga nagpaila nga mga polis nga mimando nga paablihan ang gate.

Ang tagbalay nakapangutana kun unsa’y ilang sala, ug nangutana kun may search warrant ba ang maong mga polis.

Girekisa sa mga polis ang usa ka tiguwang nga naglingkod sa gawas duol sa tindahan. Ang usa nga nag-bonnet nagpaila nga siya ang hepe sa kapolisan sa San Fernando, dayong hubo sa iyang maskara.

Wala madugay, gikuha sa mga polis ang bag sa tiguwang babaye ug gihiling. Dayon nanglakaw sila ug gidala ang tiguwang. Matud sa mga nakasaksi nga nagtuo sila nga tulisan ang maong mga grupo kay puro nakasibilyan ug wala’y nag-uniporme.

Ang tag-iya sa maong balay gud bag-o ra nga niabot gikan sa gawas sa nasud. Ang maong operasyon sa kapolisan, nindot unta kun wala’y pagpangabuso. Una, matud pa sa hepe, lehitimo ang operasyon. Ang pangutana sa katawhan, kun lehitimo man, nganong mosulod man sila sa balay nga wala’y gidalang SW?

Ikaduha, nganong nagsul-ob og bonnet ang pipila sa mga operatiba, ug mismo ang hepe naka-bonnet? Kun may sala ang nagpuyo sa balay, ngano nga wala man mokuha og SW ang mga polis?

Naa ba diay lehitimo nga wala gani kamo magdala og opisyal sa barangay aron motan-aw kun giunsa ninyo pagpahigayon ang inyong operasyon?

Bisan si kinsa ang motinamban ug moanalisar sa maong hitabo, nakahimo gyud kamo og kalapasan. Ingon niini ba diay ang klase sa atong kapolisan nga gisweldohan sa katawhan?

Sukwahi man siguro sa inyong vision nga nag-ingon “We Serve and Protect.” Mao nga dili nato mabasol ang katawhan nga nagtuo nga mga tulisan ang nangabot sa maong lugar.

Unta kining maong hitabo dili na masubli mao nga atong tawagon ang atensyon sa taga Office of the President , Office of the Ombudsman, PNP Chief Bato Dela Rosa aron mahatagan ug tudloan nila ang maong hepe sa tukmang gawi isip polis.