Brgy Cogon, Cebu City

“Ang among reklamo kay gihimo na man nga parkingan sa mga trisikad ug ubang mga sakyanan ang agianan sa mga tawo diri sa among lugar. Gipasagdan ra man intawon kini sa mga opisyal nga problema.”

Brgy Dauis-Norte, Carmen, Cebu

“ Sir Jun naunsa na man kining day care center diri nga gihimo na man hinuon nga balay sa maestra diha na man siya magpuyo kuyog iyang bana ug mga apo. Naggamit pag mga appliances pero ang barangay maoy nagbayad sa kuryente.”

Brgy Buaya, Lapu-Lapu City

“Diri sa amoa sa Zone 6 kay nibalik na man sab tawon ang daghang namaligya’g shabu labi nang atbang dapit sa naay bulabulahan nga kawayan. Usahay naa pa magpabuto og armas dihang dapita kuyawan kaming mga nagpuyo sa duol.”

Brgy Liboo, Ronda, Cebu

“Magpatabang lang unta kami niining problema namo diri sa libaongon namo nga karsada labi na kining dapit sa Upper Liboo kay daghan kaayong mga libaong. Wala kaayo kini matagad sa mga opisyal sa barangay nga problema.”

Brgy Triumfo, Carmen, Cebu

“Mamalihog kami diri sa Sito Cambenia kay naay tangkal sa baboy nga baho kaayo duol ra sab sa among balay. Nangasakit nami diri labi na sa mga bata pero wala man gihapoy gihimong aksyon ang mga opisyales namo diri.”

Brgy Cantabaco, Toledo City

“Kining among water district diri kay wala gyu’y ayo kay sige text nga pabayran na ang among water bill pero kun mabayran na gani dili na hapit paagason. Dugay na intawon nag-antos ang mga tawo diri bahin niining problemaha sir.”

Brgy Linao, Minglanilla, Cebu

“ Diri sa Upper Linao kay naay daghang namaligya’g shabu naa ra gyud dapit sa hantakan duol sa boundary sa among lungsod ug sa dakbayan sa Talisay. Daghan kaayo namaligya dili mahadlok bisag naay daghang makakita.”

Brgy Taytay, Danao City

“Diri sa among dapit luyo sa furniture sige man gihapon ang pagpamaligya’g shabu mahadlok na lang mi matag gabii. Bisan gani adlawan makita gihapon kining mga tawhana nga mamaligya.”

Brgy Mactan, Lapu-Lapu City

“ Wa bay plano nga mohimo’g greyhound operations ang mga polis diri sa City jail nga nahimutang sa Soong kay naa kami nahibaw-an bahin sa sige’g baligyaay og shabu diha sa sulod. Manghinaot kami nga mahatagan og aksyon kay luoy ang ubang piniriso.”

Brgy Gunting, Barili, Cebu

“ Kining karsada sa Sitio Ilaya padung sa Brgy. Doldol kay guba na kaayo wala gyud kini ipaayo sa taga gobyerno. Dugay na kaayo kining problemaha pero hangtod karon wala gihapon matagad.”

Brgy Bagakay, Barili, Cebu

“Daghan gihapon kaayo mga adik diri sa among lugar tungod sa kapakyas sa mga polis paghimo’g aksyon. Kun dili makaya sa tinugyanan sa balaod ang pagsulbad niini ako na lay modesiplina niining mga tawhana sir.’

Alang sa inyong mga reklamo text lang sa 09083006702