Dear Atty. Divine,
Ang akong iyaan nasakit ug na ospital. Ang iyang duha ka anak nga pulos na minyo, ang usa atua magtrabaho sa Manila samtang ang usa, seaman. Kay ako man ang nagpuyo duol sa akong iyaan, so ako ang mitabang kaniya ug midala sa ospital.
Pagkakaron nagkaproblema mi sa iyang maintenance sa tambal kay ang iyang mga anak miingon nga sila’y mobayad sa ospital apan wa na kuno sila’y kuwarta para ipamalit og tambal sa ilang inahan.
Naluoy ko sa akong iyaan. Unsa man ang angay nako nga buhaton? Makapugos ba ang akong iyaan sa pagpangayo og financial support sa iyang mga anak alang sa iyang tambal? Daghang salamat. - Felomina
* * *
Dear Felomina,
Ang mga anak sa imong iyaan, obligado sa pagsuporta sa ilang inahan base sa Article 195 sa atong Family Code (par. 3) nga nagkanayon nga ang mga ginikanan ug mga anak obligado sa pagsuporta sa usa’g usa.
Base sa balaod, kun duha o tulo ka anak ang obligado sa pagsuporta, then angay nga ilang bahinon, depende sa ilang resources ug kun pila ang panginahanglan sa imong iyaan matag buwan.
Ang maayo nimo nga buhaton mao ang pagpahibawo sa iyang mga anak sa panginahanglan sa imong iyaan. Kun dili gihapon sila mohatag og suporta alang sa iyang maintenance sa tambal mahimong moduol mo og abogado aron magpahimo mo og demand letter.
Kun dili gihapon mosanong, then mahimong modangop sa korte ang imong iyaan aron ang korte na ang momando sa iyang mga anak sa paghatag og financial support sa ilang inahan. Thanks and God Bless! -Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.