Alang sa umaabot

Ang rason kun nganong padayong nikunhod ug natun-as ang sense of foresight mao man nga daghanan sa mga tawo karon ang maghunahuna lang sa kasamtangan ug dili sa umaabot. Ingon pa nila ayaw paghunahuna og kaugmaon kay basin og di ka kaugmaan. Bisan man gani diha sa mga programa way sense of continuity tungod kay daghan ang buot mopalapad sa papel dili sa advantage sa kinabag-an kondili sa ilang kaugalingong advantage. Daghan ang moyawyaw, mamalandong, momaymay dili aron mohatag og comfort kondili aron ipahimutang ang kaugalingon diha sa maayong natad sa seguridad. Dili alang sa umaabot sa kinabag-an kondili alang sa ilang personal nga kaugmaon. Daghan ang nahimong mapasagaron,mapahimuslanon kay lagi ang umaabot layo pa mao nga sa kasamtangan lang daan mohimo na og duwa sa gahum aron inig abot sa tukmang panahon sila mamahimo nang gamhanan.