Buhisan na ang mga kooperatiba?

Primero, diha’y mga laraw nga libkason na ang mga discounts ug tax exemption sa mga senior citizen. Wala kita masayod unsa’y gidangatan sa maong plano. Labing siguro dako kining kasub-anan sa mga senior citizen.

Ug karon, anaay nag-ung-ong nga balaudnon sa Kongreso nga mag-repeal sa tax exemptions sa mga kooperatiba. Ang House Bill 4774, ginganlan og Tax Reform for Acceleration and Inclusion Bill. Gipaabot nga kun mahimo na nga balaod, 87 ka tax exemptions ang libkason, nga naglakip sa mga kooperatiba ug senior citizens. Mo’y gidangat!

Unsa man ang atong mga kongresista dinhi, sugot sila niini? Unsa ning klaseha sa tax reform? Dili ba sila makakita’g laing paagi paghipos og dugang salapi alang sa atong panudlanan, sama sa pag-intensify sa collection sa buhis ug pagtinuod paggukod sa mga  tax evaders?  Ngano nga ang mga kooperatiba ug mga senior citizen man ang ilang pahimungtan? Maayo man na sila diha sa Kongreso kay inig-retire nila ug inigka-senior citizen na nila, daghan man sila’g kuwarta busa wala magkinahanglan sa mga discounts ug tax exemptions.

* * *

Serbisyo sa LTO.  Matag anha nako sa buhatang rehiyonal sa LTO, maoy akong namatikdan nga pirmeng maghuot ang mga tawo, ilabina sa driver’s license section, hangtud na sa late afternoon.

 Apan, karong bag-o, dali ra nga mamingaw. May higayon nga nakaadto ko mga alas 4:00 pa, wa na’y tawo. Nagpasabot nga efficient na ang serbisyo sa LTO karon. Atong pasalamat ni LTO acting director Alita Pulga.

Pagpa-renew nako sa akong sakyanan, hapon na kaayo ko nga nakaadto sa LTO.  Mga alas 4:30 na, nilukat pako’g insurance. Nakabalik ko sa LTO, alas 5:00 na, apan, diha pa si Edgar Ogue, gi-process pa ang akong mga papers, ug tungod kay diha pa usab sila si Ma. Alma Saavedra, ang evaluator, ug Jenever Magdadaro, cashier, miingon si Ogue nga: “Suwayi lang, basin pa’g OK pa nila.”

Ila ko nga gi-accommodate. Tungod kay ako na lang usa, kay lagi alas 5:00 na, dali ra kaayo ko nga nahuman. In less than 10 minutes, gikan sa lamesa ni Ogue, nakuha nako ang OR.

Nakaingon ko sa akong kaugalingon nga mahimo ra man diay nga madali ang pakig-transact sa gobiyerno! Daghan  kaayong mga sugilanon bahin niining pagka-inutil sa serbisyo sa gobiyerno. Pabalik-balikon ka, anam-anamon ang mga requirements, hasta tagpila ka “sir” ug “ma’am” ang mopirma, una ka makahuman sa imong tuyo.

Salamat ni Presidente Digong Duterte nga naarang-arang na karon ang serbisyo sa gobiyerno.