Legalidad

Tungod kay pipila lang ka pudyot ang mga kapitan nga miabin kaniya, gimugna ni Mayor Tomas Osmeña ang Barangay Mayors Office (BMO) ug nitudlo siya og mga taga barangay ra usab, nga ang trabaho sama ra sa mga opisyal sa barangay. Sa laktod, nagmugna og anino nga gobiyerno sa barangay ang mayor. Legal ba kini?

Tungod kay ang mga tawo nga gipatrabaho aron modumala sa “anino nga gobiyerno” sa barangay miundang man kay wala’y nadawat nga suhol kay naglisod ang mayor sa paghatag og rason aron makapagawas og salapi nga magamit aron isuhol sa mga gipatrabaho niya ubos sa BMO, ang nahisgutang opisina gihimo nga Disaster Office sa Mayor. Sa tinamban nga pagsabot mao ra nga tawo, apan nag-ilis lang og gisul-ob.

Ang mayor niisyu og mga sakyanan ngadto sa mga pribadong tawo nga maoy nagdala sa aninong gobiyerno nga iyang gibutang sa mga barangay, kang kansang mga kapitan dili niya kaalyado. Legal ba kini? Gitugot ba kini sa balaod?

Nasayod niini ang mayor nga dili kini legal ang iyang gihimo ug mao kini ang hinungdan ngano nga dali kaayong nakaangkon ang iyang Disaster Officer nga si Nagiel Bañacia nga sa iyang opisina giisyu ang mga sakyanan ug naka memorandum receipt lang kini sa mga pribadong tawo nga giisyuhan.

Dili ba kini klaro nga pag-circumvent sa balaod? Tungod niini, gikiha ni Sambag 1 Barangay Kapitan Lemar Alcover si Mayor Osmeña ug mga kauban. Ang kaso nga Malversation of Public Property ug kalapasan sa Anti-Graft and Corrupt Practices Act gipasaka ni Alcover didto sa Ombudsman-Visayas.

Maayo ni aron maklaro sa tanan kun husto ba ang mayor o nasayop ba siya sa iyang gihimo.