Butakal!

Pastilan, asa na man intawon ang moralidad sa atong mga hinangad nga opisyal sa gobiyerno? Sa Kongreso lang daan, mismo si House Speaker Pantaleon Alvarez wala’y kukaulaw nga nanghambog nga aduna siya’y uyab ug may mga anak siya sa ubang babaye.

Pagkabaga na man lang gyud sa nawong niining tawhana, abi kay naghupot siya og taas nga puwesto sa gobiyerno ug suod kaayo sa iyang idolo nga wala’y lain kun dili si Pangulong Duterte. In fairness hinoon ni Digong, annuled na man ang iyang kasal ug sa kanhi niya asawa nga si Elizabeth Zimmerman mao nga mura’g Ok na lang nga nakig-uban siya ni Honeylet Avancena bisan kaniadto nga mayor pa siya sa Davao City ug karon nga presidente na.

Apan kini si Alvarez, dako pa man ni nga minyo ug gani ang iyang asawa nga si Evelyn Alvarez mao man ang pangulo sa Congressional Spouse Foundation. Nialisngaw kining baho sa Kongreso gumikan sa panagbikil ni Alvarez ug sa iyang suod nga higala nga si Congressman Antonio Floirendo Jr. nga pareho niya, mahilig usab sa guwapa.

Apan ang nakapamabaw sa rason sa pagkabugto sa ilang panaghigala mao nga nagumikan kini sa panag-away sa ilang mga tsiks atol sa usa ka kalihukan didto sa Bacolod. Pagkawala gyud unta’y hinungdan nga isyu, kay personal man gud ni nilang kinabuhi. Apan mga pinili ug hinangad sila sa katawhan ug naghupot og taas nga puwesto sa kagamhanan hinungdan nga ngil-ad kaayo tan-awon sa publiko ang ilang binuhatan.

Kun dili gyud mapugngan ang ilang pagka mahilig sa tsiks, puwede tingali nga isekreto na lang nila ug dili ipanghambog. Mao na ba kini ang trend karon nga dawaton na lang nato kay mao man ang gipakitang sumbanan sa anaa sa gobiyerno?

Kaniadto, allergic kaayo ang mga Pinoy kun makadungog og ingon niini, bisan gani og tsismis lang, apan karon mura’g gidawat na man lang tungod lagi kay si Alvarez bata-bata man sa presidente.

Hinaot unta nga nagpabilin pa gihapon ang decency sa mga Filipino bisan pa man og ang mga tinamod ug tinahod nga opisyal sa gobiyerno wala na’y respeto ug delicadeza sa pagbulgaray sa ilang pagka butakal.