Nangopya ni Duterte
Managsama og paagi sila si Presidente Rodrigo Duterte ug House Speaker Pantaleon Alvarez sa pagdumala og mga eskandalo sa pribado nilang kinabuhi: Angkunon na daan ang ilang kalapasan, labi na ang ilang mga atraso sa kaminyuon, aron nga masagang sa dili pa moulbo sa publiko.
Malampuson kining maong paagi alang ni Duterte. Sa wa pa modeklarar sa iyang kandidatura sa pagka presidente, gikumpisal na niya daan ang pagbudhi sa iyang asawa ug pagdungan niya og daghang hinigugma, mao nga wa na mahatagi og importansiya atol sa kampanya.
* * *
Mao nga dili mabasol si Alvarez nga nisunod sa iyang katagi-Davao aron nga dili masentro sa nahiaguman karong kontrobersiya ang personal niyang kinabuhi. Tungod sa pag-ulbo sa ilang panagsungi ni Kongresista Tonyboy Floirendo:
Giangkon na daan nga daghan siya og anak sa gawas;
Nikumpisal sab nga bisan kaduha na siya maminyo, duna siya’y laing babaye nga gikarelasyon karon;
Niinsistir nga dili siya kahukasan pagka abogado kay kun himuong sukaranan sa disbarment ang pagpangabit, wala na’y abogado nga mahibilin; kay
Kumbinsido siya nga pipila na lang ka abogado ang wa’y mga relasyon gawas sa ilang kaminyuon.
* * *
Apan lahi ni Duterte nga niladlad dayon sa mabulukon niyang relasyon sa kababayen-an, nauwahi na og diyutay si Alvarez:
Naunhan siya sa hinigugma ni Floirendo nga si Cathy Binag nga nipahibawo sa media nga nasuko si Alvarez dihang nagkaaway silang Binag ug ang karelasyon ron ni Alvarez nga si Jennifer Maliwanag Vicencio;
Nabangilan na ang iyang kumpisal sa gibisto ni Binag nga nidangop nilang Floirendo ang asawa ug mga anak ni Alvarez tungod sa iyang pamabaye; ug
Hagbay ra siya nga ginganlan ni Duterte nga daghan og asawa.
* * *
Mas dali nga mapasaylo ang mga atraso ni Alvarez, gawas lang kun ang iyang uyab nakadaot sa iyang trabaho ug nakabuslot sa panudlanan sa katawhan, kun katuohan ang kumpisal. Nitug-an siya sa DzMM nga unom ang iyang mga anak sa gawas. Apan nisiwil ang mga detalye.
Matud niya sa kinatibuk-an walo ang iyang anak: Duha sa unang asawa ug upat sa ikaduha. Kun walo ang iyang anak, duha ra’y anak sa gawas. Kun unom ang anak sa gawas, 12 diay ang iyang anak ug may upat pa ka anak nga wa itug-an.
- Latest
