Nakatungtong sa kabaw
Ambot unsay hinungdan nganong sa mga tugpahanan man kasagaran nga mopasundayag ang mga naghupot sa katungdanan sa ilang pagkahubog sa gahom. Tungod ba kaha kay ang pagsakay sa ayroplano nagpabiling pribilehiyo nga di maabot sa kinabag-an sa katawhan? O mas isog lang ang mga nakakita sa pagbisto sa ilang mga pangabuso sa tugpahanan?
Si Sandra Cam, nga nangangkong whistleblower sa jueteng ug nakatabang pagtultol sa tagoanan ni Kerwin Espinosa sa Abu Dhabi ug pagbalhog ni Senador Leila de Lima sa prisohan, maoy labing uwahi ug gikabalak-ang di maoy kataposan sa listahan.
* * *
Ang gikatahong pagpamugos ni Cam nga makasud sa VIP lounge sa Ninoy Aquino International Airport (NAIA) nakapahinumdom nako sa Sugbuanon nga sakop sa gabinete ni kanhi Presidente Noynoy Aquino nga pila pa lang gani ka semana human natudlo sa puwesto nidemanda nang i-upgrade sa business class sa iyang flights paingon sa kaulohan.
Bisan wa pa mokatap ang social media niadtong higayona, may nakasumbong dayon sa Malakanyang sa makauuwaw niyang pahimus. Maong sunod nga nahibaw-an sa iyang mga higala dinhi sa Sugbo nga natangtang na siya sa katungdanan.
* * *
Laing tinudlo ni Aquino, ning higayona mahistrado sa taas nga hukmanan, nakontrobersiyal sab kay way kukaikog nga nag-business class uban sa iyang security escorts sa iyang mga biyahe sa Sugbo ug ubang bahin sa Pilipinas.
Maong hingpit nga gihangop sa mga botante ang pipila ka higayon nga molinya si Presidente Duterte uban sa kasarangang mga pasahero sa tugpahanan ug mopili og kasarangang lingkoranan sa ayroplano. Nabantayan nako sa pila na ka higayon nga di mahiligon og VIP lounge silang Gobernador Junjun Davide ug Mayor Tommy OsmeÑa.
* * *
Bisan gitangtang karong bag-o ang sakop sa iyang gabinete nga gipasanginlan og pangurakot, wa igdungog si Duterte nga istrikto sa iyang mga suod nga mohimo og ginagmay nga pahimus sa katungdanan. Gani, giduphan dayon niya si Cam human nagpakauwaw sa NAIA.
Nga mahimong maoy nakapagara sa uban niyang mga tinudlo. Sama sa usa sa iyang mga sinaligan dinhi sa Sugbo. Nga nagda og 50 ka kauban ug way bayad silang nanud sa venue sa usa sa kalihokan sa kalibotanong beauty pageant nga gipahigayon dinhi sa ato karong bag-o.
* * *
- Latest
