Pagdumot

PEBRERO 19, 2017: Ikakawhaa’g-pito nga Domingo sulod sa tuig.

Mga Pagbasa: Lv. 19; 1-2;17-18/

Sal. 103/1 Cor. 3;16-23/Mt. 5;38-48

Negatibo kaayo ang atong pagsabot niini apan kay lagi ingon nga tawhanon dili gyud ni nato kalikayan labi na kun kini nakahatag nato og tumang kasakitan. Apan kun magdumot gani ang tawo, wala kini magpasabot nga dautan na lang gyud siya kay siya madinumtanon. Nagpasabot lamang kini nga ang pagdumot nga nahuptan niya timaan lamang sa iyang dakong pagtagad nga gihatag sa maong tawo. Gihigugma niya ang tawo apan ang maong tawo nakapasakit lang gyud niya o nakahimo og butang makadaut niya. Ang nasakitan maglisud pagdawat mao nga ang gugma nailisan man og kalagot, kahiubos ug kasilag. Kinahanglanon gyud ang grasya aron kita makapasaylo ug dugang pa, mahinungdanon kaayo ang pagpasaylo dili tungod lang sa tawo nga nakasala kondili sa imong kaugalingon gyud mismo.  Kay kun padayon kang naghambin og kasuko nan, pabiling miserable ang imong kinabuhi.