Geohazard maps nga sayop?

Naunsa bang pagkaunsaha nga ang mga geo-hazard maps kuno nga gihatag ngadto sa mga kalungsoran dinhi sa lalawigan sa Sugbo daghan mang mga sayop-sayop.

Maayo lang unta to kun ginagmay ra nga sayop, apan dili ra ba. Sumala pa sa nigawas nga balita sa mga pamantalaan, adunay mga lungsod nga nawala sa geohazard maps ang ilang barangay ug aduna say nawala nga sapa.

Giunsa man diay ni paghimo? Dili ba ang paghimo niining geohazard maps aktwal man kini adtuon ang lugar aron matun-an kun unsa ang mga nagung-ong o posibleng mga peligro nga mahitabo diha sa maong mga dapit?

Ang disaster mitigation ug disaster preparedness kinahanglan og aktwal nga assessment sa mga lugar sama sa mga landslide prone ug flood prone areas o gitawag nga danger zones.

Kining geohazard maps matud pa sa report gikan sa usa ka ahensya sa gobiyerno nga maoy batid sa mga paglihok sa yuta  epekto sa pagusab-usab sa sistema sa kalikopan.

Dako kaayo og gamit ang maong mga mapa kay diha man magbase ang mga disaster managers ug responders sa ilang aksyon kun unsay ilang angay andamon o buhaton aron mamenusan ang danyos sa kabtangan ug kinabuhi.

Sa samang rason, gamiton kini sa mga responders aron basehan sa ilang angay nga buhaton aron maluwas ang kinahanglang luwason ug sila usab luwas nga mabuhat ang ilang mga trabaho.

Kun sayop nang daan ang mapa, aw maglisod gyud ang himuong mga preparasyon. Busa angay sigurong korihian kini og dali samtang wa pay dagkong panghitabo.