Brgy Poblacion, Cordova, Cebu

“Nganong wala man gyud dakpa ang nag-operate og  illegal swertres diri sa among lugar? Asa na man diay ang mga polis nga naa ra man sa plaza dapit ang balay niining financier sa ilegal nga sugal?”

 Brgy Jubay, Liloan, Cebu

“Diri sa Sitio Tiltilon naay magtiayon nga igsuon sa usa ka retired police nga maoy coordinator sa illegal swertres diri sa among lugar. Dugay na kaayo ning ilang ilegal nga kalihukan, pero wala gyud kaaksyon ang kapitan namo sa barangay.”

 Brgy Babag 2, Lapu-Lapu City

“Pasalamat mi kay naundang na unta ang paglabay sa mga basura sa open field sa luyo nga bahin sa barangay hall, pero karon nabalik na sab kay ang caretaker sa maong lugar gipasulod man isip job order employee sa siyudad.”

 Brgy Mactan, Lapu-Lapu City

“Grabe kaayo ang mga opisyal namo sa barangay kay wala man gyuy aksyon bahin sa lawom nga tubig sa karsada paingon sa Angasil. Purhisyo kaayo namong moagi sa maong lugar matag adlaw kay pwerte na gyud lisura sa agianan.”

 Brgy Pulpogan, Consolacion, Cebu

“Naunsa na man intawon ang mga opisyal namo sa barangay, labi na sa among kapitan, kay wala man gyud magpakabana sa mga problema labi na sa illegal drugs.

 Brgy Paknaan, Mandaue City

“Kanus-a man intawon ni humanon pagtrabaho ang karsada diri paingon sa eskwelahan kay nakahatag og kaapike sa mga estudyante. Gisigehan ra man og buslot o guba ang dalan pero wala mi kabantay nga naay gitrabaho para maayo ning karsadaha.”

 Brgy Cambuhawi, Balamban, Cebu

“Naunsa na man intawon ang among mga opisyal diri sa barangay nga gitugotan man nga mangolekta’g dagko nga kantidad alang sa barangay clearance nga miabot na og P150. Nahibulong lang mi kay sa uban nga barangay barato ra man ang pagpaningil sa barangay clearance.”

 Brgy Canjulao, Lapu-Lapu City

“Naunsa na man ang swertres diri sa among lugar bisa’g may warning na kanila wala man gihapon manghunong. Namalhin na man hinoon og laing lugar duol sa barangay hall nga bati na hinoon tan-awon sa mga tawo.”

 Brgy Hagdan, Oslob, Cebu

“Ang among opisyal sa barangay dugay na kaayong wala gyud mag-atiman sa street light diri, ngitngit kaayo. Delikado kaayo sa mga sakyanan ug mga tawo kay ngitngit, kuyaw kaayo sa disgrasya.”

 Brgy Mambaling, Cebu City

“Diri sa Sitio Tangke gisigehan ra man og ronda pero wala man gyud madakpi ang gikaintapan nga druglord diri, daghan pa kaayo ni sila diri. Hinaot nga dunay himoong tininuod nga ronda ang mga polis nga madakpan gyud ang drug lords.”

Alang sa inyong mga reklamo text lang sa 09326425494