Testimonya ni Kerwin

Nagsulti ba sa tinuod si Kerwin Espinosa atol sa hearing sa Senado  kalabot sa iyang operasyon sa druga sa Visayas? Daghan man gud ang nagduda sa iyang pamahayag mahitungod sa iyang mga gipanghinganlan nga mga nalambigit sa iyang ilegal nga negosyo.

Bisan si Senador Panfilo Lacson nagduda niini. Matud niya nga wala magtakdo ang pahayag ni Espinosa ug Ronnie Dayan kabahin sa panahon nga mihatag kuno si Espinosa og milyones ngadto kang Senador Leila de Lima sa dihang Justice secretary pa kini.

Hinuon ang consistent lamang sa ilang pamahayag mao nga adunay gayud kunoy salapi nga gihatag si Espinosa ngadto kang de Lima. Mismong si Dayan, ang drayber kaniadto sa senador, ang miangkon niini. Siya kuno ang mi-deliver sa salapi gikan sa maong drug lord ngadto sa kang de Lima.

Laing pamahayag ni Kerwin nga daghan usab ang nagduda mao ang iyang giingon nga naghatagan siya og monthly payola kang kanhi general ug karon Daanbantayan Mayor Vicente Loot. Kini tungod kay dili kuno siya mismo ang personal nga naghatagan og salapi ngadto kang Loot.

Miani usab og pagduda ang iyang pangangkon nga adto siya usahay mokuha og suplay sa druga kang Peter Lim nga usa kuno ka negosyante dinhi sa Sugbo. Kini gumikan usab kay wala kuno niya personal nga nahimamat ang maong magpapatigayon.

Apan bisan pa man niining mga pagduda sa pipila, kinahanglan usab nga tugkaron sa otoridad ang halapad nga koneksiyon ni Espinosa sa mga kapolisan ug ubang mga opisyal sa kagamhanan. Kun atong ibasi sa iyang pamahayag, klaro gayud nga daghan siyag gitingal niining iyang negosyo sa druga.

Imposible usab kun magtumo-tumo lamang si Espinosa paghingalan og mga personalidad. Siguro adunay dakong kamatuoran ang iyang gipamahayag. Apan nagkinahanglan usab siya og konkretong ebidensiya pagmatuod sa iyang alegasyon.

Hinuon primero pa lamang kadto nga testimonya ni Espinosa sa Senado. Basin kun aduna pa kini mga eksplosibong ebidensiya nga gihuptan. Ug ato lamang paaboton sa umaabot nga mga adlaw.