Malubong na!

Mikabat na og 27 ka tuig human sa iyang kamatayon, 23 ka tuig sukad gipauli dinhi sa Pilipinas ang iyang patay’ng lawas gikan sa Hawaii, matuldokan na ang dugay na kaayong hisgutanan kun malubong ba o dili si kanhi presidente Ferdinand Marcos sa Libingan Ng Mga Bayani.

Sa botos nga 9-5, mayoriya nga giuyonan sa mga mahestrado sa Korte Suprema ang mga argumento: Una, nga wala moabusar sa iyang hurisdiksyon si Presidente Rodrigo Duterte sa pagmando nga ipalubong sa LNMB ang patay nga lawas sa giila nga diktador nga presidente.

Ikaduha, walay balaod nga nagdili sa pagpalubong ni presidente Marcos sa LNMB. Nasuta sa Korte Suprema nga hangtod karon walay balaod o executive issuance nga nagdili sa pagbuwag sa LNMB isip public domain gikan sa kagamitan niini isip lubnganan sa nangamatay nga mga sundawo, national artist ug sa mga kanhi presidente sa nasud.

Ikatulo, nga gihuptan sa kanhi presidente ang mga kwalipikasyon nga siya angay’ng malubong sa LNMB, sanglit siya usa ka kanhi presidente, commander-in-chief, sundawo, Medal of Valor awardee, magbabalaod, Secretary of National Defense.

Ikaupat, wala makonbikto ang kanhi presidente og mga kaso nga naglambigit og moral torpitude. Pipila sa mga kaso nga maglambigit sa moral turpitude mao ang bigamy, concubinage, smuggling, rape, estafa pinaagi sa pagpalsipikar og mga dokumento, attempted bribery, profiteering, murder, pagpangawat ug daghan pa.

Sa maong desisyon nabahin  ang katawhang Pilipinhon. Alang sa mga nabiktima sa diktadoriya sa kanhi presidente, dili gihapon makiangayon ang nahukman sa  Korte Suprema. Hangtod karon nagpadayon pa sila sa pagpangita sa hustisya nga gihikaw kanila. Apan alang sa uban panahon na nga mahatagan og katapusan ang dugay na nga nakapabahin sa katawhang Pilipinhon.

Sa mosugot kita o sa dili, sanglit nitingog ug nihukom na ang Korte Suprema nga maoy atong gihatagan sa katungod sa katapusang paghukom sa maong issue, isip kabahin sa usa ka katilingban nga nibugtaw og kahapsay, dili man kinahanglan nga magkahiusa sa tanang baruganan apan tungod ug alang sa kahusayan, kat-onan nato ang pagtahud.

Apan sa pagtahud, wala magpasabot sa pagtahan sa imong bili isip tawo. Nilampos man ang mga Marcos nga mapalubong ang patay nga lawas sa kanhi presidente diha sa LNMB, apan dili na mawakli sa kasaysayan ang kamatuoran nga si Marcos nga ilubong sa Libingan Ng Mga Bayani nahimong diktador ug niyatak sa tawhanong katungod sa mga Pilipino ug sa nasud.