Gusto nga i-disinherit ang anak

Dear Atty. Divine,

Nagsulat ko nimo kay mangutana ko labot sa akong ipahimo nga Last Will and Testament. May tulo ko ka anak, ang duha pamilyado na, apan ang akong kamanghuran wa pa maminyo ug mao gyu’y naghatag namo og problema.

Wa siya’y trabaho ug nagsalig lang namo nga iyang mga ginikanan ug nagbisyo pa gyud. Manghagis basta dili hatagan og kuwarta ug iya lang mi nga hadlokon nga patyon kuno mi kun dili mi mohatag sa iyang gusto.

Plano namo karon nga magpahimo og Last Will and Testament ug dili gyud namo binlan og kabtangan kining among kamanghuran kay wa gyud siya’y respeto kanamo ug kanunay mi nga makuyawan niya, ilabi na kun manghagis. Mahimo ba namo siya nga i-disinherit?  Daghang salamat. —Tony

Dear Tony,

Base sa atong balaod, ang mga anak compulsory heirs sa iyang mga ginikanan, busa dili siya mahimong hikawan sa iyang bahin sa kabtangan, kana maoy general rule.  Apan ang atong balaod, nagtugot sa mga ginikanan sa pag-disinherit sa iyang anak base sa mosunod nga grounds nga gilatid sa Article 919 of the Civil Code nga nagkanayon: “The following shall be sufficient causes for the disinheritance of children and descendants, legitimate as well as illegitimate: xxx 6) Maltreatment of the testator by word or deed, by the child or descendant; xxx.” Sa ato pa, kanang gibuhat nga pagmaltrato sa inyong anak diha kaninyo mahimo kanang basehan sa inyong pag-disinherit sa inyong anak. Busa sa imo unyang paghimo sa Last Will and Testament, kinahanglan nga imong ilakip sa pagbutang kun unsay rason ngano nga imong tangtangan sa iyang katungod sa pag-inherit ang inyong anak nga kamanghuran. Ikaw ug ang imong asawa kinahanglan sab nga mohimo og managlahi nga Last Will and Testament kay wa man itugot sa atong balaod ang Joint nga Last Will and Testament. Thanks and God Bless.- Atty. Divine