Mr. Barangay
Brgy Patao, Bantayan, Cebu
"Naunsa na man tawon ning sugal diri sa among barangay uy, halos dili na man gyud mabangbang, labi na sa tong-its. Wala man gyud mohimo’g aksyon ang among mga opisyal, hasta mga polis wala sab magpakabana."
Brgy Poblacion-Occidental, Consolacion, Cebu
“Hangyo lang unta mi nga sumpoon ang kusog nga hantak diri kay saba ug samok kaayo ning mga tawhana. Hatagan unta dayon kini og dinalian nga aksyon sa among mga opisyal sa barangay.”
Brgy Sapangdaku, Cebu City
“Daghan pa man gihapon ang namaligya’g shabu diri sa among lugar, labi na gyud diri sa Sitio Lupa kay halos na man lang i-display sa mga lamesa ang ilang ipamaligya nga mura’g isda.”
Brgy Agus, Lapu-Lapu City
“Kining Sitio Ibabao nabantog na intawon ni nga labing daghan og rugby boys nga samok kaayo sa panan-aw sa mga tawo. Wala man sab molihok ang mga tanod ug polis aron unta badlongon o dakpon kining mga batan-ona kay mangawat na man ang uban nila.”
Brgy hagdan, sta fe., cebu
“Amo lang unta ipasusi ang mga habal-habal driver diri sa among lugar sa isla sa Kinatarcan, abusado kaayo kay nagumon na sa ilegal nga drugas. Delikado kaayo sa mga pasahero kay kusog kaayo ni sila mopadagan unya wala ra ba ni sila’y mga lisensya.”
Brgy Kangkaibe, Bantayan, Cebu
“Naproblema lang gyud mi niining mga binuhi nga iro sa kabarangayan diri sa isla, labi na sa mga highway, kay mokalit lang og labang nga maoy hinungdan sa disgrasya sa mga sakyanan. Gani may mga naangol ug namatay na tungod sa iro.”
Brgy Mactan, Lapu-Lapu City
"Magpatabang unta mi kay naay furniture maker diri nga abog kaayo unya puwerte sab gyud nga bahoa. Palihug mi’g report ani sa ahensya para masusi ni kun naa ba sila’y permit kay migamit man gud ni sila’g chemicals.”
Brgy Duljo-Fatima, Cebu City
“Maayo unta’g susihon og tarong ang among barangay, labi na diri sa Sitio Saduco padung sa baybayon kay daghan pa man gihapon kaayo ang shabu diri. Manawagan ko sa mga polis nga tarungon nila’g susi para madakpan ang mga namaligya.”
Brgy Luz, Cebu City
”Naunsa na man ning mga tawo diri sa Sto Niño sa Cabantan nga misurender na man unta ni sila pero mibalik man gihapon pagpamaligya’g shabu. Nakuyawan mi kay kun simbako pamusilon ni sila’g vigilante mapagan unya ang mga wa’y labot.”
Brgy Hipodromo, Cebu City
“Reklamo lang unta mi diri sa among barangay kay nganong wala man dakpa ang mga mamaligya’g shabu nga klaro man kaayo ni sila sa ilang bisyo. Naa diay pinalabi ang mga polis sa ilang kampanya sa ilegal nga drugas?”
Brgy Calamba, Cebu City
“Diri sa A. Lopez daghan man gihapon ang namaligya’g shabu, sugal ug uban pa nga mga ilegal, labi na sa hantak, pero ang nakaproblema wala man gyud ni dakpa nga naa may mga polis nga nagpuyo diri ra pud sa among barangay.”
Alang sa inyong mga reklamo text lang sa 09326425494
- Latest
