Sayo sa buntag alas tres sa kaadlawon kun wa ko masayop ako nahigmata aron unta tagikon ang nahabiling anib sa drama nga nag-ulohan: " I-text ko Lang ang Akong Gugma! Apan bisan unsaon nako wala gyuy maski gamay nga inspirasyon nga misulod sa akong hunahuna. Mao nga nakahukom na lang kong monaug sa ubos sa may simbahan aron sud-ungon ang krusipiho nga nagbitay sa may simbahan nga gamay. Ug sa wala lang tuyoa nakapangagho ko sa hilom samtang gisud-ong ko ang krusipiho. Daw nahibalik ako sa Ignatian Retreat kaniadto diin akong gipamalandongan ang impiyerno. Ang impiyerno diay dili lang kahimtang, ang impiyerno usa ka delusyon o ang pag-ilad sa kaugalingon pinaagi sa paggambalay og langit nga hawa sa langitnong kinaiya nga iya sa Dios. Nibalik ko sa taas ug akong gipadayon ang pagtagik ang chapter 102 ug nahuman tuod kini apan sa naghinapos nga drama sa gugma nigitib ang laing mugna sa imahinasyon. Ang mensahe mao nga himoang pag-ampo bisan gani ang imong kasinatian sa pag-inusara kay after all dili tanang pag-ampo kasinatian sa consolation. Dunay mga pag-ampo nga dunay pabawon nga desolation apan sila enlightening ug makaluwas.