Mr Barangay

Brgy Agus, Lapu-Lapu City

“Naay balay diri sa among lugar nga kanunay magpaagas og hugaw nga tubig unya baho ra ba kaayo. Pero wala may aksyon nga gihimo ang kapitan sa barangay nga naa ra man duol sa iyang balay.”

 Brgy Poblacion, Tubigon, Bohol

“Amo lang ireklamo ang port terminal diri sa lungsod kay mahal kaayo ilang pangayo sa terminal fee pero wala makaatiman kay pwerteng inita sa sulod. Luoy kaayo kanunay ang daghang mga pasahero kay panington og bogbog nga unta nagbayad man mig dako sa terminal fee.”

 Brgy Dumlog, Talisay City

“Hangyo lang unta mi sa mga manguhaay og basura diri sa among barangay nga apilon sad unta nila’g kuha ang mga basura diri sa San Pio Village kay nagtipun-og na intawon ang mga basura unya baho pa gyud kaayo.”

 Brgy Mactan, Lapu-Lapu City

“Mamalihog unta mi Sir nga kuhaon na unta nila ang mga basura diri sa Soong 1, Sitio Bato kay dugay na kaayong wala kuhaa baho na kaayo unya hugaw kaayo tan-awon kay gikatag na man sad sa mga iro ang mga basura.“

 Brgy Guinacot, Danao City

“Ireklamo namo ang mga mamuhatay og pusil kay wala may respeto sa mga silingan kay hambugero kaayo kanunay lang nga magpabuto sa iyang armas labi na kun mahubog. Maayo unta’g mabadlong ni siya kay daghan naming mga silingan nga nahasol niining tawhana.”

 Brgy Tejero, Cebu City

“Naa lang mi reklamo bahin aning sakop sa clean and green sa siyudad kay halos dili kaatiman sa iyang trabaho dili makapanilhig diri sa McArthur Boulevard unya kun makapanilhig man sige yawyaw  kay ngano kunong hugaw kaayo ang iyang pwesto nga silhiganan.”

 Brgy Mabolo, Cebu City

“Amo lang ni ireport ang kusog nga pagpamaligya’g shabu diri dapit sa may Holy Name bisa’g naay daghang makakita magtinunolay man gihapon sa shabu. Kuyawan mi sa mga bata Sir kay makakita man sad basin mosunod unya sa pagpamaligya o pagsuyop ba hinuon.”

 Brgy Lawaan 1, Talisay City

“Naa mi silingan diri nga dugay nang gibuhat ang pagpangawat sa kuryente sa VECO kuyawan kaming mga silingan kay basin simbako masunog maangin mi sa binuhatan sa usa lang ka tawo. Amo na man ni gireklamo sa taga VECO pero igo ra man arion dili man dakpon para  motagam.”

 Brgy Catarman, Liloan, Cebu

“Kanus-an diay  ipatuman ang curfew batok sa mga minor de edad diri sa among lugar kay diri sa landing dapit Purok Sambag kay daghan kaayong mga batan-on ang mag-inom kilid sa karsada unya usahay alihan pa ang agianan maluoy lang gud mi sa ubang mga motorista.”

 Brgy Subangdaku, Mandaue City

“Amo lang ireklamo ang mga driver sa habalhabal diri ilawom sa flyover kay sila na man ang nanghawod sige’g panguha’g pasahero unya kaming mga tricycle driver nga mag-parking dili na makakuha’g pasahero. Kun among badlungon mangasuko man  hinuon ni sila duna tingali gisaligan.”

 Brgy Basak, Cebu City

“Wala man gyu’y nakabadlong sa naninda tapad sa Trinity School kay halos dili na makaagi ang tawo kay ang agianan ila man gibaligyaan luoy kaayo ubang mga bata kay adto na moagi sa karsada kuyaw madasmagan sa mga sakyanan.”

 Alang sa inyong mga reklamo text lang sa 09326425494