Nakadawat ako og tawag gikan sa usa ka radio station nga nagpakisayod kabahin sa reklamo sa usa ka beneficiary gumikan sa kalangay sa pagpanghatag sa tax refund ngadto sa mga retirees ug aktibo nga sakop sa Bureau of Fire Protection-Region 7.
Napang-apud-apod na ang maong tax refund ngadto sa mga personnel nga anaa sa listahan niadtong Hunyo 15-16, 2016. Nalangay ang pagpang-apud-apod niini apan wala kini gituyo sa in-charge kay gihuwat pa man niya ang opisyal nga listahan gikan sa BFP central office.
Unta nahatagan og katin-awan ang publiko, ilabi na ngadto sa mga nakadungog sa mireklamo.
* * *
Daghan ang nangutana kanako bahin sa usa ka bombero nga gipasakahan og kasong murder didto sa Cebu City Prosecutors Office kaniadtong Hunyo 6. Gipangutana ko sa akong mga higala sa media kabahin sa maong isyu nga nakapaukay usab sa among organisasyon. Tinuod nga ang maong bombero nadestino sa Cebu City Fire Station ug padayon pa siya nga nagtrabaho hangtod karon kay wala pa man mapasaka sa korte ang kaso.
Apan alang sa kasayuran sa publiko nga ang maong kaso dili kabahin sa iyang pagka bombero, kun dili, personal niya kini nga kaso. In other words, dili kini job-related.
Hinoon, kun unsa may sangpotan sa kaso, ang bugtong makahatag sa hukom niini mao gyud ang korte ug ang matag akusado sa kriminal nga kaso is presumed innocent until proven guilty beyond reasonable doubt.
Apan bisan pa man niini, mohimo gihapon kami og pakisusi sa kalamboan sa maong kaso.
* * *
Sa kataposan, ang kadagkoan sa BFP-7 moduyog sa kasub-anan sa pamilya sa among kauban sa buhat nga si FO1 Ritche Banzon nga nadestino sa Danao City Fire Station gumikan sa iyang hinanali nga kamatayon kaniadtong Hunyo 3 tungod sa pagkadisgrasya sa motor.
Ugma na ang iyang lubong sa Danao City.