Brigada Eskwela

Karong adlawa ang kick off alang sa usa ka semana nga pagpahigayon sa brigada eskwela. Ang brigada eskwela mao ang pagpakita sa bayanihan spirit sa mga Filipino pinaagi sa pagtinabangay alang sa usa ka kawsa.

Kana mao ang pagpanglimpyo ug pag-andam sa mga publikong tunghaan alang sa pagbukas sa klase karong Hunyo 13. Gawas sa pagpanglimpyo, masusi usab kun andam na ba ang mga publiko nga tunghaan gikan sa classrooms kun duna bay mga guba aron maayo, mga libro ug uban pa nga kinahanglanon alang sa pagbukas sa klase.

Gidasig sa Department of Education ang publiko, ilabi na ang mga ginikanan nga mosalmot, mogahin sa ilang oras ug kahago sa pagpanglimpyo sa mga classroom samtang ang ubang mga indibidwal ug nagkalain-laing sektor nga motampo gawas sa ilang oras ug kahago, ilang tabang pinansyal o bisan unsang matang sa kontribusyon alang sa pagbukas sa klase sa mga pangpublikong tunghaan nga mas nagkinahanglan sa tabang.

Tema karong tuiga mao "Tayo Para sa Paaralang Ligtas, Maayos, at Handa Mula Kindergarten Hanggang Senior High School".

Sukad 2003 nga gisugdan sa DepEd ang brigada eskwela. Karong tuiga gipaabot nga dunay 20 milyones ka tinun-an sa mga publikong tunghaan ang makapahimulos sa brigada eskwela.

Buksan ang usa ka semana nga brigada eskwela didto sa Sta. Cruz Pingkian High School, Kayapa, Nueva Vizcaya sa Rehiyon 2. Samtang dinhi sa Central Visayas gipangandaman na sa mga magtutudlo, mga ginikanan, tinun-an ug sa ubang stakeholders ang pagpahigayon sa brigada eskwela.

Diha sa brigada eskwela atong makita ang paglihok sa diwa sa bayanihan kon ang pagtinabangay. Mithi nga angay ipatigbabaw ug palig-onon dili ra sa brigada eskwela, ilabi na nga karong tuiga sugdan ang pagpatuman sa K to 12 program sa Department of Education.

Nindot man unta nga hunahunaon ang katuyoan sa brigada eskwela apan dako kaayo nga bakikaw nga nilungtad na lang sa 13 ka tuig sukad gibuksan ang brigada eskwela apan hangtod karon walay alibyo ug walay dakong kausaban sa pamaagi ug pagtubag sa dakong panginahanglan sa dugang tunghaan, classrooms, tarung ug tukma nga gidaghanon sa mga libro alang sa matag usa ka tinun-an, nga dili na unta magsawo pa og libro ug padayong kakuwangan sa gidaghanon sa mga magtutudlo.

Magbaguod intawon sa daghang loads ang mga magtutudlo nga mag-double shift og klase tungod kay nagkuwang sa classrooms ug pwerting daghana sa mga tinun-an.

Ang ideal ratio unta sa mga magtutudlo ug mga tinun-an nga 1:45 alang sa high school ug 1:40 alang sa elementarya, apan wala matuman. Dunay mga tunghaan nga magsugwak ang mga tinun-an, ilabi na sa elementarya.

Gani dunay moabot og tag 50-60 ka tinun-an sa usa ka classroom.  Sa ingon niini nga gidaghanon, makaluluoy ang maestra nga maugtas sa pagbadlong sa mga tinun-an nga pwerting sabaa. Ang mga tinun-an sa ilang bahin wala nay maayong konsentrasyon sa klase tungod sa kasaba, kaalimuot ug sa kadaghang disturbo.

Bisan kun gipatuman sa DepEd ang double shift aron lang mahatagan sa edukasyon ang mga tinun-an, apan nasakripisyo ang kalidad sa edukasyon.

Hinaot nga sa bag-ong administrasyon ni incoming president Rodrigo Duterte, usa sa labing una niyang tan-awon sa pagpatuman sa kausaban nga iyang gisaad mao ang paghatag sa dekalidad nga edukasyon.