Brgy Guinsay, Danao City

Naay graduate diri og criminology sa Sitio Cogon nga abusado na kaayo, mura’g polis na og kinaiya kay magsige’g patukar sa videoke bisa’g lawom nang gabii. Saba kaayo, dili mi makatulog nga mga silingan.

Brgy Cabancalan, Mandaue City

Kining lugar namo sa Pilit-Sambag delikado kaayo ang agianan kay naay mga gibangag sa manhole nga wala man taboni, kuyaw kaayo sa moagi nga mga tricycle kay kun mosipyat ang drayber disgrasya gyud ang resulta.

Brgy Lawaan 1, Talisay City

Unsa may among buhaton niining duha namo ka silingan nga mga kawatan kaayo. Usahay manulis pa gyud ni sila panahon sa kaadlawon. Wala may nagpakabana niini ang mga opisyal sa barangay ug ang kapolisan.

Brgy Taloot, Argao, Cebu

Duna unta ko’y reklamo diri sa among mga opisyal kay hangtod karon wala pa man gihapon ipatrabaho ang karsada nga naa na man unta’y budget bahin niini. Among nahibaw-an nga ang semento nga para unta sa karsada gigamit man sa lain sa taga barangay.

Brgy Togonon, Danao City

Diri sa among barangay wala man kaayo manumbaling ang among kapitan sa mga kalihukan sa among lugar kay halos ang secretary na man lang gyud niya ang magbuot sa mga gimbuhaton. Maayo unta og masusi ni sa taga DILG.

Brgy Dawis Sur, Carmen, Cebu

Concern lang ko niining karsada namo diri kay wala man tiwasa pagsemento, labi na ang paingon sa eskwelahan. Maglisod pag-agi ang mga sakyanan, bisan gani mga motor maproblema pag-agi tungod sa kabati kaayo sa karsada."

Brgy Tapilon, Daan-Bantayan, Cebu

Congratulations sa bag-ong napili nga mayor namo sa lungsod. Unta hatagan gilayon niya’g pagtagad ang problema namo diri sa among barangay, labi na sa ilegal nga drugas kay dugay na kaayo kining problemaha diri.

Brgy Catmondaan, Catmon, Cebu

Magpatabang lang unta mi sa among dalan diri sa Sitio Ilum kay lapok na gyud kaayo kun mag-uwan, unya lisud kaayo iagi, luoy kaayo ang mga estudyante kay magkahugaw intawon inig abot sa eskwelahan.

Brgy Pagsabungan, Mandaue City

Diri sa among barangay daghan na man nga mga batan-ong badlungon uy, dili na mopatuo sa ginikanan tungod sa bisyo sa ilegal nga drugas. Wala man gyud molihok ang mga opisyal namo sa barangay ug mga polis niining problemaha.

Brgy Poblacion Oriental, Consolacion, Cebu

Hangyo lang unta mi nga tabangan mi nga masumpo kining naghitak nga hantak diri sa among lugar kay daghan na nga mga asawa ug ginikanan nga naproblema kay ang para palit nila’g bugas mahurot na man hinoon sa sugal.

Brgy Camputhaw, Cebu City

Kining sa Mango Avenue duol sa Caltex Gas Station kay anaa man gihapon ang daghang mga bata nga mangunguot. Luoy kaayo ang mga foreigner kay maoy kasagaran nilang mabiktima. Asa na man diay ang mga polis?

Alang sa inyong mga reklamo text lang sa 09156203998