Dili ikalimod nga daghan karon sa mga nagpuyo sa mga habog nga lugar dinhi sa dakbayan, nakasinati gayud og problema sa kanihit sa tubig.
Gani busy kaayo ang mga kawani sa water refilling stations nga duol niining mga dapit nga nagnihit ang tubig sa MCWD kay ang mga tawo mapugos na man pagpalit og mineral water aron ilang mainom ug ikaligo.
Adunay mga pamilya nga naglagot sa mga kawani sa MCWD kay kuno wala magtagad sa paghatod kanila og tubig. Apan dili baya sala sa mga kawani sa MCWD nga nagnihit na ang atong tubig. Kaniadtong miaging hapon, akong nakita sa footage sa TV news nga naughan na gyud pag-ayo ang dam didto sa Jaclupan, Talisay ug labaw na sa Buhisan, dinhi sa dakbayan sa Sugbo.
Sa laktod, akong nasabtan nga kay nagnihit na man og suplay nga tubig ang MCWD gikan sa ilang mga tinubdan sa Jaclupan ug Buhisan, nagsalig na lang sila karon sa ilang pipila ka deep well ug sa tubig nga gikan sa Luyang, Carmen. Misamot ang kanihit sa tubig kay ang mga dagkong water tanker sa mga barangay sa kabukiran, makit-an nato nga mokuha og tubig gikan sa mga hydrants aron dad-on nila sa bukid. Kagahapon, usa ka kawani sa MCWD sayo kaayo nga naghatod og tulo ka tangke sa tubig alang sa mga lumolupyo sa Upper Apas. Nangalipay intawon ang mga lumolupyo nga wala na gayud maagasi og tubig sulod na sa dul-an usa ka semana.
Akong nalantawan nga usa ka tawo adunay buot itunol ngadto sa drayber sa water tanker sa MCWD. Puwerteng nakabalibad sa drayber, nag-atras-atras nga mura’g dili gayud modawat. Wala nako ibuwag kanila ang akong panan-aw. Dayon, gipikpik sa tawo ang abaga sa drayber sa MCWD tanker. Giduol nako ang tawo ug akong nasayran nga gusto ra diay unta niya nga pahalipayan ang drayber, apan wala gayud modawat. Gidayeg namo ang drayber sa MCWD nga among nailhan nga mao diay si Leonides “Dennis” Yaun kay tinuoray’ng serbisyo ra gyud ang iya. Mibiya siya sa among lugar lapas na ang alas nueve sa buntag human siya makahatod og tulo ka tangke sa tubig.
Angay usab nga pasalamatan ang boss ni Dennis nga si Edgar Ortega ug ni MCWD Chairman Rene Mercado sa pagtudlo og maayong kinaiya sa usa ka buotang kawani.