Brgy Gabi, Cordova, Cebu

“Ang among agianan diri luyo sa gym paingon sa sudlonon nga mga balay kay gihimo na man hinuon nga labayanan sa mga basura ug kasilyas sa uban. Aksyonan unta kining among reklamo.”

Brgy Candaguit, Sibonga, Cebu

“Dunay tukoron nga cell site diri sa among lugar unya misupak mi nga mga lumolupyo kay nabalaka mi sa among panglawas pero gihadlok man mi sa tag-iya sa yuta. Mga opisyal namo diri sa barangay wala man nagpakabana.”

Brgy Buaya, Lapu-Lapu City

“Sa merkado sa Saac kay nagpabadlong man ang ubang tindera, hapit na man lang sila magpatunga sa karsada ug maglisod na hinuon pag-agi ang mga sakyanan. May task force man unta nga nagbantay diri pero wala man kabadlong.”

Brgy Looc, Mandaue City

“Magpatabang mi nga mabadlong unta kining mga nagpataka’g parking sa ilang sakyanan dapit sa may UC-LM padung sa Mactan bridge kay maoy nakadugang sa pagbara sa trapiko diri nga dapita, labi na panahon sa rush hour.”

Brgy Mambaling, Cebu City

“Ang reklamo namo diri sa NABA-Alaska mao ang mga manindahay kay nakadugang sa kahuot sa agianan para sa mga tawo, labi na kun dunay alsahon nga container sa tubig. Halos dili nami makaagi kay naa man sila maninda hapit na sa tunga sa among agianan.”

Brgy Dapdap, Carcar City

“Kining karsada sa Poblacion 3 kay daghan na kaayong dagko nga libaong unya nangatipak na ang daplin sa kanal ug abog pa gyud kaayo, labi na kining karsada paingon sa Byokyol.”

Brgy Alang-Alang, Mandaue City

“Hangyo lang unta mi nga atimanon gyud ang pagkuha sa mga basura sa Sitio Pulang-Bukid kay tagdugay intawon magpundok, usahay mabaho na lang. Ang among kapitan diri wala man magpakabana sa among reklamo bahin sa dili makuha nga mga basura.”

Brgy Jaclupan, Talisay City

“Wala man gyud makabadlong ang mga opisyal namo diri sa barangay bahin sa pataka’g parking sa mga sakyanan sa mga nagpuyo diri. Kuyaw kaayo sa mga motorista kay kun dunay katagbo magkabangga na lang hapit tungod sa kagamay sa agianan.”

Brgy Tamiao, Compostela, Cebu

“Problema namo diri ang sapa kay itom na kaayo’g tubig. Unya kun mohangin baho pa gyud kaayo. Luoy kaayo mi nga mga nagpuyo diri, labi na sa mga bata, kay nagkasakit na tungod niining planta sa softdrinks nga pataka’g labay sa ilang mga hugaw.”

Brgy Punta Engaño, Lapu-Lapu City

“Naproblema gyud mi diri kay abog kaayo ang among lugar tungod sa pagsige’g hakot og mga anapog nga gigamit sa gitrabaho nga building duol sa among gipuy-an. Unta aksyonan kini dayon sa labing dali nga panahon.”

 Alang sa inyong mga reklamo text lang sa 09156203998