Rating surveys

Ang mga rating surveys nagpakita kun unsay gusto o dili gusto sa mga tawo nga napangutana bahin sa mga isyu, usa niini kining umaabot nga eleksyon. Ang tingog ba sa pipila ka lugas mao na ang tingog sa tanan?

Adunay panawagan karon nga mas maayong idili na pagpublikar ang mga resulta niini ug kadtong adto lang sa nagpa-survey ang resulta kun unsa ang ilang gusto nga buhaton niini. May mga magbabalaod nga mihulagway sa mga surveys nga pang ‘mind conditioning’ lang. Mura man gud og nagtudlo kini sa publiko og sayop nga panglantaw bahin sa tinud-anay nga kahimtang sa isyu. Makatarunganon baya kini nga panawagan tungod kay kun buot subayon, wala pay surveys alang sa mga presidentiables ug national positions sukad sa milabay’ng tuig nga niabot og 10 mil o 100 mil ka tawo ang gipangutana o respondents.

Dili ang pipila lang ka libo ang representasyon sa kapin 100 milyones nga Filipino. Apan ngano man nga ikalain man niadtong mga nangiwit sa survey ang pagpublikar niini?

Kini tungod kay wa’y nakasiguro sa kamatinud-anon sa surveys. Wa tinuod makasulti kun hinimo-himo lang kini pabor sa usa ka kandidato o dili.

Apan klaro man nga ang nalipay mao kadtong mga leading sa ratings apan sakit alang niadtong wala nigasto para niini nga katuyoan kay mao may maiwit. Kinsa man nga survey company ang mogasto nga walay makuhang kita sa ilang serbisyo? Gastos kaayo kay kinahanglan man mo-hire og mga tawo nga aktwal nga mohimo sa survey diha sa mga lugar, mga galamiton, plete ug uban pa, ug labaw sa tanan kinahanglan usab nga makaginansya ang survey company dili ba?

Way dautan sa surveys, apan di kinahanglan nga makaimpluwensya sa panglantaw sa katawhan kay mao kini magmugna og kasamok.

Sa mga wala makauyon sa resulta dili angay motuo niini kay dili kini maoy tinuod nga tingog sa katawhan, sa Mayo 9 pa.