Swimming pool

Nagpadayon ang grabe nga kainit sa panahon ug gani natala na usab sa PAGASA ang labing init nga temperatura karon lang semanaha.

Mao nga subsob ang kampanya sa atong kabomberohan aron makalikay kita sa sunog karong panahona. Gani base sa mga datos nga atong nahipos, nagkadaghan na karon ang girespondehan nga grass fire kun itandi sa susama nga mga buwan sa niaging tuig.

Grabe gyud kauga sa mga sagbot ug sa atong kabukiran. Maoy rason nga gihangyo kadtong manigarilyo nga dili magpataka og labay sa ilang upos kay makamugna kini og sunog.

Ug labaw sa tanan, gidili gyud ang pagdaob sa mga basura ug uban pa nga daobanan kay posible kining mokatap ug modako ang sunog. Mag- amping unta kita nga makalikay kita sa sunog karong panahona sanglit nagkuwang na pud ang supply sa tubig.

Busa awhag namo sa publiko, uban sa paghangyo sa MCWD ngadto sa mga konsumidor niini, nga magdaginot unta kita og tubig aron sa panahon nga magkinahanglan kita niini, ilabi na og dunay sunog nga mahitabo makasiguro kita nga aduna pa’y supply sa tubig nga magamit.

Inyo ba nga nahunahuna kun unsay mahitabo pananglit adunay sunog ug wala kita’y igong supply sa tubig? Kadako siguro sa kalamidad nga mahitabo, apan ang inyong kabomberohan duna na'y gihimong pagpangandam niini.

Nakig-coordinate kami sa mga dagkong hotels ug resorts diin mahimo namo nga makuhaan og supply sa tubig ang ilang mga swimming pools kun magnihit ang supply sa tubig.

Ug kun wala na gyud kami laing makuhaan, posibleng sa dagat na lang kami mokuha og tubig. Apan dili maayo ang tubig sa dagat kay makadaot kini sa tangke sa firetrucks.

Mao nga kinahanglan gyud nga dili kita mag-usik-usik sa tubig kay dako kaayo kini og gamit sa atong pang-adlaw adlaw nga kalihokan ug labaw sa tanan dako kini og gamit kun adunay sunog.