Wangwang

Usa ka trahedya ang nahitabo didto sa Mindanao diin ang gisakyan sa among mga kauban sa buhat nalimbuwad ug anaa na sila sa kritikal nga kahimtang.

Alang sa kasayuran sa publiko, gidesinyo ang siren sa bombero nga maoy labing kusog og tingog kay lagi kinabuhi man ug kabtangan ang buot luwason sa mga nagsakay sa fire truck.

Kun itandi sa wangwang sa ambulansya ug patrol car sa kapolisan, dili kaayo kini kusog kun itandi sa siren sa trak sa mga bombero.

Ug kun ugaling malabyan kita og police patrol car ug ambulansya, dili kaayo kita bation og kabalaka, apan kun ang mga fire trucks na gani ang magbahasbahas uban sa kusog kaayo niini nga siren, moaksyon dayon ta og kabalaka.

Kini maoy rason nga daghan kaayo ang manawag sa among opisina kay magpakisusi kun asa dapita ang sunog.

Makakuha gyud og atensyon ang siren sa atong fire trucks. Apan nahibawo ba kamo nga ang pagpatingog namo sa siren usa kini ka hangyo sa mga motorista ug sa mga pedestrian nga mopadaplin aron kami makaagi ug dali namo nga maabot ang fire scene?

Angayang timan-an nga duna kami luwason nga kabtangan ug mga kinabuhi sa matag patingog namo sa siren, mao nga gihangyo namo ang tanan nga hawanan ang agianan sa mga bombero.

* * *

Ang mga electric fans nga naughan na sa iyang lubricating oil, usahay mohunong na pagtuyok ug kun dili mabantayan, usa kini sa makamugna og sunog.

Mentras sayo pa, atimana ninyo ang inyong mga electric fans kay sagad karong panahona, subsob kaayo ang paggamit niini.