Second chance

Usa ka babaye akong gikahinabi. Niingon siya nga wa na kuno siya’y salig sa mga lalaki kini tungod kay siya gibinuangan sa iyang kanhi. In fairness gwapa ang maong babaye, smart, maayong manulti husto sa gitas-on sa laktod gwapa nga babaye ug nalambigit na lang pud sa daghang mga lalaki.

Dili na kuno niya iseryoso ang tanan ug kuntento na kuno siya sa fling fling. Ako siyang gipangutana: “Tungod ba kay nasakitan ka sa imong kanhi mao nga tira pasagad ka na lang baby?” nauknol siya ug gi-divert ang iyang explanation.

Ako nakaingon sa akong kaugalingon nga tingali tungod sa maong hitabo nahimo siyang ingon ini apan anugon lang gyud kaayo ang iyang kinabuhi kun siya magpadayon niini. Matag tawo masayop, kitang tanan masayop apan wa kini magpasabot nga way second chance aron kita makabangon gikan sa atong pagkahilukapa sa lapok sa kasal-anan. Ang Ginoo niubog sa lapok iya kitang nakita diha sa atong pagkabulawan bisan pa man sa atong pagkalapokon.

Apan unta kun kini gihatag sa Dios kanato nan, di kini nato usikan kay mubo ra gyud ang atong kinabuhi ug ang maong kinabuhi may kinutoban. Year of Mercy karon segun pa ni Papa Fancisco unta ato kining gamiton ingon nga sukaranan aron atong pangitaon ang kalooy nga Diosnon ug atong himoon ang kalooy ingon nga atong sukaranan padung sa kinabuhing balaanon.