Wala’y kinutoban nga gugma sa Diyos

Unsa ka ba kalig-on sa imong pagtuo ngadto sa Diyos ug kaisog sa kasingkasing ug hunahuna sa mga panahon nga sukdon ang imong pagkatawo sa labing bug-at nga mga problema sa kinabuhi?

Kini ang estorya sa usa ka business magnate sa Thailand nga si Mary Sarindhorn Mativacharon nga nipaambit giunsa siya sa pag-usab sa iyang hugot nga pagtuo ngadto sa Diyos.

Siya ang nihatag og testimoniya sa ikapito ka adlaw sa congress proper sa 51st International Eucharistic Congress. Si Mary Sarindhorn Mativacharon ilado sa Thailand sa iyang masaaron nga trabaho ug negosyo.

Apan matud niya, 20 ka tuig sa iyang kinabuhi ang nawala human siya pasanginli sa sala nga wala niya mahimo. Tungod sa negosyo, nahimong pinangita si Mary sa balaod sa Thailand.

Iyang gihulagway ang iyang kaugalingon sa karakter ni Dr. Richard Kimble nga gidala ni Harrison Ford sa salida nga "The Fugitive." Napugos siya sa pagbiya sa iyang bana ug mga anak aron motago sa salaod nga wala niya mahimo.

Apan sa iyang pagtagotago, nahimong miserable ang iyang kinabuhi. Nagpuyo sa usa ka gamay nga lugar nga layo kaniadto sa iyang haruhay ug hamugaway nga pagpuyo.

May mga panahon nga wala siya’y tarung nga pagkaon, wala’y tarung kinatugan ug gibaliwa sa katilingban. Nawagtang na ang tanan kaniya, gawas lang sa iyang hugot nga pagsalig sa Ginoo.

Buddhist ang pamilya ni Mary. Apan nakatungha siya ug ang iyang duha ka igsoong babaye sa usa ka Katoliko nga eskuwelahan nga gidumala sa mga Ursuline Sisters sa Thailand.

Bisan kun wala pa siya hingpit mabunyagi sa pagka Katoliko niadtong higayona, hugot na ang pagsalig ni Mary sa Diyos. Apan dunay mga panahon nga buot na unta niyang molunga ug tapuson na ang iyang kinabuhi.

Apan matud ni Mary nga samtang hapit na siya magsalimoang, may nadungog siya nga tingog nga nagdasig kaniya sa dili paglunga. Alang niya tingog kadto sa Diyos.

Human sa 14 ka tuig nga pagtago-tago naangkon ni Mary ang hustisya. Nahimo na siyang gawasnon. Apan sa iyang pagkagawasnon wala pa siya hingpit maalim ug matibuok pagbalik.

Nilungtad pa og unom ka tuig una niya hingpit maangkon ang kalinaw sa paghuna-huna ug pagbati tungod kay iya nang hingpit napasaylo ang tanang nakasala kaniya.

Gikan sa iyang mga kauban sa trabaho nga niluib kaniya, sa mga tawo nga nigukod kaniya ug sa iyang bana nga nibiya kaniya ug sa ilang mga anak.

Karon mapasigarbohon nga gipahibawo ni Mary nga tungod sa wala’y kinutoban nga gugma sa Diyos, hingpit nang naalim ang pait nga kasinatian nga iyang natagamtam.

Aktibo siya sa mga kalihukan sa simbahang Katoliko, sa mga buhat sa kaluoy ug paghatag og katekisis diha sa iyang mga katrabaho, sa negosyo ug sa mga okasyon nga siya makasangyaw sa wala’y kinutoban nga gugma sa Diyos isip pasalamat ug paghimaya sa bag-o niyang kinabuhi.