Pwede diay

Makapadasig ang gipakitang ehemplo ug hinaot nga motuhop sa pagbati, ilabi na sa mga batan-on, ang testimoniya sa usa ka entertainer sa pagkatawo ni Paul Ponce.

Usa ka Venezuelan professional juggler nga niabot na sa bisan asang dapit sa kalibutan aron mohatag og kalingawan sa mga tawo. Pamilya siya sa mga entertainer. Iyang ginikanan nagtrabaho sa usa ka circus.

Sa mga hinan-aw sa America's Got Talent, ang pamilyang Ponce nisalmot sa kompetisyon sa season 10. Si Paul isip usa ka juggler ug ang iyang inahan ug amahan isip crossbow archers.

Sa audition pulos sila nakuha, apan nataktak si Paul sa judges cut ug ang tandem sa iyang inahan ug amahan ang nilusot sa judges cut. Ang 60- anyos nga inahan ni Paul, kansang screen name mao, si Silvia Silvia, nipabuto sa usa ka balloon gamit ang pana.

Ang balloon nga gipatung-an og botilya sa bino gibalanse sa usa ka nipis nga stick nga gipaak sa amahan ni Paul nga si Victor Ponce. Sa pagbuto sa balloon nasawo sa nipis nga stick ang botilya sa bino nga gipatong sa balloon.

Ang ikaduhang act ni Silvia Silvia mao ang makapanlimbawot sa balhibo ug labing kuyaw. Siya mismo ang nipana sa usa ka mansanas nga gipatong sa iyang ulo.

Giunsa niya paghimo?  Si Silvia mismo ang nipatung sa mansanas sa iyang ulo ug gamit ang crossbow, iyang gipabanda ang pana sa tulo ka board, dayon ang uhas niigo sa mansanas nga gipatong sa iyang ulo.  Nakadawat og standing ovation sa mga hurado si Silvia.

Apan dili kini maoy estorya. Si Paul nga dinapit sa 51st International Eucharisitc Congress dinhi sa Sugbo nipaambit sa iyang kasinatian sa dihang wala siya makasabot ug makatugkad kun unsay iyang gusto.

Kansang kinabuhi naa sa showbusiness, matud ni Paul nga iyang nasuwayan ang tanan. Bisyo, babaye ug uban pa. Apan wala siya makakita og katagbawan niini.

Naghigwaos ug dunay daghang pangutana mahitungod sa iyang pagtuo. Matud ni Paul, ang iyang mga ginikanan niangkon nga mga katoliko, apan wala magpraktis sa ilang pagtuo. Deboto sa Mahal nga Birhen si Paul.

Iyang gibutyag nga hugot niyang giampo nga makabaton og asawa nga sama niya, hugot ang pagtuo sa Makagagahum. Nakaplagan niya ang iyang hinigugma nga si Lia, 10 ka tuig human niya hingpit nga gidawat si Kristo sa iyang kinabuhi.

Kada adlaw siya mosimba. Bisan sa mga nasud nga nihit ang simbahang Katoliko motuyo siya sa pag-adto aron mosimba. Matud ni Paul nga bisan sa long distance relationship ug sa mga higayon nga magka-uban sila ni Lia, ilang gipatuman ang kaputli sa ilang relasyon hangtod nga sila naminyo.

Karong may tulo na sila ka anak mas nagkalig-on pa ang ilang pagsalig ug pagtuo sa Ginoo. Isip pamilya dungan silang mosimba ug matag gabii kauban sa ilang mga anak dungan sila nga mag-ampo, magpasalamat ug mo-ampo alang sa uban.