EDITORYAL - Pagbarato sa lana, dili maayo

Nangalipay ang mga motorista niining pagsige og tibugsok sa presyo sa produktong petrolyo karon sa kalibotanong merkado, aduna na  mga panawagan nga pakubsan na ang pletihan.

Apan walay nangusog bisan sa mga magbabalaod aron paubsan na usab ang presyo sa mga batakang palaliton karon. Kining pagbarato sa presyo sa petrolyo maayong paminawon apan mas maayo kun kini motakod sa presyo sa mga palaliton sa katawhan.

Unsa may gibuhat sa atong mga magbabalaod nganong wala may nilihok bahin niini? Nganong ang mga ahensya sa gobiyerno walay nangusog paghimo og mga lakang o imbestigasyon pagsusi kun nganong kining mga palaliton mahal man gihapon.

Numero unong apektado sa pagkubos sa presyo sa lana ang mga Overseas Filipino Workers ilabi na kadtong nagtrabaho sa Middle East, kay ang uban kanila wa na makalarga og balik kay nanangtang  na og trabahante ang ilang mga kompanya.

Kini  gumikan sa kabarato na sa ilang nag-unang produkto didto ug ang pipila ka mga dagkong infrastructure projects sa ilang gobiyerno gipangkanselar lang una.

Kadtong mga pamilya sa OFWs dinhi, maglisod gyud sa pagpaigo sa kwartang mapadala kanila tungod sa kamahal gihapon sa presyo sa palaliton karon ug way kasigurohan kun kanus-a sila mapadalhan pagbalik. Gawas pa niini, nameligro usab nga motibugsok ang ekonomiya sa nasud nunot niining pagmenus unya sa dollar remittances sa mga OFWs balik dinhi sa Pilipinas.

Matud pa sa mga eksperto, ang dollar remittances sa mga OFWs ug sa mga immigrants gikan sa nagkadaiyang nasud, mao ang nagsilbing hapin sa Pilipinas maong wala kaayo kini maapektahi sud sa nanglabay nga mga global crisis. Apan karon, way kasigurohan kun makasugakod ang nasud kay apektado na unya ang dollar remittances sa mga OFWs.

Giluwas sa mga OFWs ang Pilipinas kaniadto, karon sila na usab maoy nagkinahanglan, angay nga proteksyonan sa gobiyerno ang pamilya sa mga OFWs ug ang mga ordinaryong konsumidor pinaagi sa pagpaus-os sa presyo sa mga batakang palaliton.