Napulo’g usa ka hepe sa kapolisan sa kalungsoran sa Sugbo ang tangtangon sa ilang katungdanan kay nasuta nga wala gayud makatuman sa ilang tahas, ilabi na sa paghimo og kampanya sa ilegal nga mga kalihukan, sama sa sugal ug gidiling drugas.
Nindot kining lakang ni Senior Superintendent Clifford Gairanod, ang bag-ong direktor sa Cebu Provincial Police Office (CPPO), apan dili kini makapatul-id sa pagkaligoy sa maong mga opisyal sa kapolisan nga posible nga mituyo sa wala paghimo’g kampanya tungod sa lingin nga rason.
Sagad gyud nga himoon sa kadagkoan sa kapolisan nga igo lang relibohan ang hepe nga dili makatuman sa ilang tahas, apan paglabay sa pipila ka semana, itudlo ra gihapon kini pagka hepe sa kapolisan sa lain na usab nga lungsod o kaha siyudad.
Kini maoy rason nga ang mga opisyal dili mahadlok kun sila relibohan sa katungdanan kay wala may mahanaw kanila ug matudlo ra man gihapon sila sa laing puwesto.
Hinuon, sa kaligdong ni Senior Superintendent Gairanod, daghan ang nagtuo nga makatabang kini aron mausab ang imahe sa mga opisyal nga nagmika lang sa ilang mga katungdanan.
Daghang mga dapit dinhi sa probinsya sa Sugbo nga nag-atubang og problema sa ilegal nga drugas, apan daghang mga hepe sa kapolisan nga nagmika lang sa paghimo og hugtanay nga kampanya.
Kun ang mga special units sa kapolisan makahimo pagronda sa mga tigbaligya og shabu diha sa lainlaing mga dapit sa rehiyon, walay rason nga ang maong mga polis nga nadestino sa lungsod, dili makahimo.
Sila ang nasayod kun kinsa ang mga tawo nga nalambigit sa ilegal nga kalihukan, apan ila ra nga gipasagdan. Dili imposible nga ang maong mga polis nabutaan sa gisuborno kanila mao nga sila nagkyugpos lang ug wala mohimo og kampanya.