EDITORYAL – Pakigsandurot sa kabus

Maayo ang mga gi-organisar nga mga nagkadaiyang kalihokan alang sa 51st International Eucharistic Congress nga himuon dinhi sa Sugbo karong sunod nga semana.

Naglakip kini sa mga kalihokan dili lang sa kaparian ug mga layko kondili hasta sa kabataan nga nasakop sa kabus nga pamilya.

Kagahapon kapin usa ka libong mga kabus ang giimbitar alang sa usa ka paniudto sa mga sakop sa Archdiocese of Vancouver gikan sa nasud sa Canada.

Alang sa mga partisipante nindot kini nga kasinatian. Pagpakita kini sa diwa sa pagka-Kristiyano ang pakigsandurot ug paghinatagay.

Kapunitan unta kini og  pagtulon-an sa tanan ilabi na sa mga adunahan nga nag-awas-awas ang kwarta samtang aduna sila’y mga kaigsuonang wala gyuy ikalatag nga pagkaon sa ilang lamesa.

Panahon karon sa gugma ug kaluoy sumala pa sa Santo Papa, busa panahon usab nga bahinan sa grasya ang mga nagkinahanglan.

Apan kinahanglan nga dili na lang magpabilin hangtud sa hangtud ang mga kabus sa ilang gikahimutangan karon, kinahanglang manikay-sikay sila aron mahaw-as sa ilang kabutang.

Dili mahimong basulon ang gobiyerno kun nganong anaa sila karon sa ilang sitwasyon tungod kay daghang mga paagi nga dili kinahanglang ang gobiyerno maoy mohungit.

Dako hinuon og papel ang gobiyerno aron sila matabangan ilabi na sa paghatag kanila og kapanginabuhian nga kaya sa ilang abilidad ug kapasidad.

Samtang maayo ang Conditional Cash Transfer nga programa sa gobiyerno karon, apan angay sigurohon nga ang pundo mapadung gyud sa nagkinahanglan niini.

Wala’y nasud nga wala’y kabus, managlahi lang kini sa kagrabehon.