Ebidensiya ni Enrile

Unsa may ebidensiya nga gihuptan ni Senate Minority Leader Juan Ponce Enrile batok ni Presidente Noynoy Aquino sa engkuwentro sa Mamasapano, Maguindanao nga nisangpot sa kamatayon sa 44 ka sakop sa Special Action Force (SAF) nga naglakip sa usa ka Sugbuanon ug usa ka Bol-anon? Nipasidaan si Enrile pagpabuto sa iyang ebidensiya atol sa pagbukas pagbalik sa imbestigasyon sa Senado unya sa Miyerkules, Enero 27, duha ka adlaw human sa unang anibersaryo sa trahedya.

Gihapinang daan ni Enrile ang iyang ebidensiya sa mosunod:

Una, nga dinalian ang paglupad ni Aquino sa Zamboanga samtang nagpadayon ang gubat sa Mamasapano; ug

Ikaduha, inay luwason gipasagdan ni Aquino nga mangamatay ang SAF 44.

* * *

Sa iyang pagduaw sa Arangkada sa DYAB Abante Pa, Bisaya! gahapon, nipasabot si Senador Grace Poe, nga maoy nagduma sa imbestigasyon sa Senado, nga komprehensibo ang ilang pakisusi ug nahurot nang mga pangutana sa mga senador sa ilang lima ka public hearings ug lima ka executive sessions. Nitugot siyang ablihan pagbalik ang imbestigasyon tungod sa pasalig ni Enrile nga duha ka oras ray iyang gikinahanglan pagpasupot sa mga pangutana nga wa maluwati kay napriso sa kasong plunder.

Nipasalig si Poe nga wa maapektahi ang iyang pagduma sa imbestigasyon sa ilang kasuod ni Aquino. Alang ni Poe igo nang iyang pagtumbok ni Aquino nga “politically responsible” kay way igong mga ebidensiya sa mga kasong kriminal.

* * *

Nagduda si Senador Chiz Escudero, nga nikuyog ni Poe pagduaw sa Sugbo, nga si Heneral Getulio Napenas, kanhi hepe sa SAF nga nidagan pagka senador ubos sa UNA, ang naghatag sa kasayuran nga gitakdang ipabuto ni Enrile.

Kumbinsido si Escudero nga wa isulti ni Napenas ang tanang panghitabo sa nagkalainlaing mga imbestigasyon sa trahedya. Gipasanginlan niya si Napenas nga wa sab mohatag sa tanang kasayuran ngadto sa militar, bisan nameligro nang iyang mga sakop, aron maangkon ang tanang kredito sa pagkuha sa langyaw’ng terorista nga si Zulkifli bin Hir alyas Marwan.

* * *

Kun tinuod nga si Napenas ang tinubdan sa kasayuran ni Enrile, mahimong mohungaw ang iyang gipasiatab nga bomba. Kay gawas nga nakig-alyansa na siya sa mga kaatbang sa administrasyon, giusikan niya ang tanang kahigayonan sa pagbutyag sa tanang detalye sa dul-an sa usa ka oras nga pinusilay tali sa SAF commandos ug sa mga sakop sa Moro Islamic Liberation Front (MILF), Moro National Liberation Front (MNLF) ug private armed groups (PAGs).

Apan kun may laing tinubdan si Enrile, labi na kun ligdong nga opisyal sa Armadong Kusog nga mopasangil nga gipugngan silang Aquino pagtabang sa SAF aron di mameligro ang ceasefire uban sa MILF ug ang Bangsamoro Basic Law (BBL), mahimong makabawos sa presidente nga nakapapriso niya tungod sa pork barrel scandal.

[email protected]