EDITORIAL – Political Will

Gisugdan na pagpangguba ang kabalayan daplin sa Gorordo Avenue atbang sa eskena sa Sudlon Street nga sakop sa Barangay Lahug nga giingong apektado sa pagpalapad sa karsada sa maong dapit.

Gani miinsister gyud si suspended Mayor Michael Rama gub-onon ang sementado nga kural sa simbahan sa “Mormons” kay nakalapas kini sa gilatid unta nga aseras.

Ang atbang nga bahin sa dapit diin gipangguba karon ang panimalay, gub-onon usab matud ni Engr. Nicomedes Leonor sa Department of Public Works and Highways (DPWH) Cebu City District.

Ang maong lugar kanunay’ng makasinati og problema sa trapiko kay gamay kaayo ang maong bahin sa karsada. Kun mapalapdan na ang maong bahin sa karsada, dili na tingali angay pa nga supakon ang pagtukod og flyover sa maong dapit. Apil nga angay’ng butangan og flyover mao ang eskena sa Gorordo Avenue ug Salinas Drive, dapit na sa JY Square, kay aron nga diretso na ang mga sakyanan.

Apil gani nga angay’ng lihukon sa kagamhanan sa dakbayan sa Sugbo mao ang pagpalapad ug pag-aspalto sa Kamagong Street kay dako kaayo kini og matampo nga masulbad ang problema sa trapiko sa Gorordo Avenue.

Ang kuwang lang sa atong mga opisyal mao ang political will kay daghan sa mga konsehal ang mahadlok nga mangasuko ang mga tawo nga maapektahan sa pagpalapad sa karsada.

Anaa diha pagkasalawayon sa ubang mga opisyal tungod kay gipalabi nila ang kaugalingon nila nga interest, ug wala huna-hunaa nga daghan ang makapahimulos kun mapalapad ang karsada.

Hinuon, ang mga traffic police ug civilian traffic enforcers, ingon man ang mga opisyal sa barangay, dili gyud unta motugot nga kun mapalapdan na ang karsada gamiton lang kini isip parking area sa mga tag-iya og sakyanan.